DAGHAN ang mga nangreklamo kalabot niining nanggawas karon nga mga advertisement sa mga politiko o kadtong pipila ka mga maklaro nga dunay plano nga modagan sa umaabot nga piniliay.

Kini gihulagway nga usa ka premature campaigning nga gidili gyud unta ubos sa Section 80 sa Omnibus Election Code.

Ang maong balaod nagkanayon nga bisan kinsa - kandidato man o dili - gidid-an sa pagpahigayon og election campaign o mohimo'g mga politikanhong kalihukan gawas lang sa campaign period nga maoy gitugot sa balaod.

Kadtong mohimo sa maong salaod mahimong pasakaan og kaso ug posibleng i-disqualify usab sa piniliay.

Apan kay election campaign man ang gihisgutan buot ipasabot nga kini naglakip og kandidato sa umaabot nga piniliay.

Ning puntoha unsaon man pagkiha o pag-disqualify sa tawo kon di siya kandidato?

Pero ubos sa Section 15 sa Republic Act 8436, kadtong naka-file sa Certificate of Candidacy paga-ilhon lang nga usa ka kandidato kon ang campaign period sa position sa iyang pagka-kandidatora magsugod na.

Sa ato pa, kining mga politiko nga nagpabaha na og mga ads sa television, diyaryo ug radyo way kalapasan nga nahimo kay gawas nga wa pa sila ka-file sa CoC, wa pa sab magsugod ang campaign period.

Klaro kaayo nga ang kandidato mahimo lang pasakaan og kaso kon kini nakahimo'g salaod sulod lang sa pagsugod ug sa katapusang adlaw sa kampanya nga gitugot sa balaod.

Sa laktod nga pagkasulti, kanang giingon nila nga premature campaigning dili na na tuohan sa korte ug hingpit na kining napapas ug nabasura, unless nga balaod kalabot niini usbon na sab.