ANDAM na ang tulo ka pangbato sa Sonshine Sports Management Promoter sa boxing kang Pastor Apollo Quiboloy sa For the Gift of Education Boxing Revolution III 'No guts No glory' karong Hunyo 25 didto sa Davao City Recreation Center, kanhi Alemendras Gym.
Ang mga main event mao sila Edrin Dapudong (30-6-19) win-loss-KO batok Richard Garcia (25-21-1) sa super flyweight samtang ang mga supporting event sila Lorenzo Villanueva vs Rey Las Pe¤as sa Junior lightweight, Rolando Magbanua vs Jimmy Aducal sa junior featherweight ug Romel Asenjo vs Michael Rodriguez sa junior flyweight.
Atol sa Davao Sportswriter Association (DSA) Forum didto sa NCCC Mall Food Cove kagahapon, gipahayag ni Head Coach Bruce Lerio nga andam na sila tungod sa ilang taas nga training labina nga mga Pinoy sab nga kuyaw ang kontra.
"Kusog ang among pagpangandam kay taas ang among training. Ang hangin, stamina sa mga boxers, kompleto sila. Mga taga-NCR (National Capital Region). Maningkamot mi tanan kauban ang coach nga modaug mi," ni Lerio.
Bahin ni Dapudong, duna na silay plano aron mapildi ang iyang kalaban, "nagplano nami nga likayan ang iyang jab, straight. Di pod ko makaingon nga ma-knockout pero maabot lang na."
Samtang sulti ni Villanueva nga lauman nga nindot ang ilang away, "nindot kini nga dula, tan-awon na lang ninyo kay fighter pod siya."
Magdepende sab si Magbanua sa Aducal kung unsa ang dinulaan niini aron mahimo niya ang plano, "maminaw lang ko kang coach kay depende sa iyang style, gagawa ako ng strategy."
Ang weigh in sa event himuon sa Hunyo 25, alas 10 sa buntag didto sa NCCC Mall Activity Center.
Samtang gi-awhag ni Aaron Vergara, Jose Maria College representante ang tanan nga motan-aw diin ang tiket mapalit sa kantidad P1,500 red carpet, P1,000 lower box, P300 ug P200 sa admin sa Tobys Sports Arena sa Abreeza, Marianos Sports Market sa Victoria Plaza ug Holiday Gym and Spa sa Torres St.
Mamahimo sab ikontak si Jun o MCor sa numerong 234-3227 o 0926-217-0218. MSR