DAVAO DEL NORTE -- Nadakpan na og balik ang upat ka mga piniriso ga mipuga sa Tagum City Police Station sa managlahing lugar niadtong Miyerkules.

Alas 4:30 sa hapon sa maong adlaw, unang nasikop ang mga menor-de-edad nga puga nga sila John dela Peña ug Rolby Suelto, didto sa lungsod sa Nabunturan.

Samtang sila si Ram John Gudin ug Jasper Salas, nadakpan sa alas 8 sa gabii didto sa GMA Lodging House, Lopez Jaina Street, Poblacion, Digos, Davao del Sur.

Ang mga pugante nagtinudloay kung kinsa gayud ang nagplano ug nanguna sa maong pag-eskapo.

"Gidala ra ko nila, Ma'am!" pamalibad ni Suelto.

Molupyo si Suelto sa Nabunturan mao nga human nakapuga niadtong Martes, midiretso siya sa iyang lola sa maong dapit aron matulog lang og usa ka gabii kuyog si dela Peña ug laing menor-de-edad.

Nasayran nga nadakpan ang mga nahisgutan sa kapulisan sa dihang padulong na unta mohawa gikan Nabunturan.

"Sila ang suheto diri, Ma'am. Kanang mga bataa. Sila ang nakabalo sa pasikot-sikot dinhi. Sila ang nagtudlo sa amoa," sulti usab ni Salas, kinsa nangulipas nga mao'y nangulo sa pagpuga.

Nasayran sab nga ang duha ka mga menor-de-edad, mga street children sa siyudad nga gawas-sulod na sa prisohan.

Wala pod mi-angkon ang mga dinakpan nga gikan kanila ang gabas nga gigamit sa pagputol kadena sa sira sa prisohan.

"Daan na to diri, Ma'am. Dala sa mga priso sa una nga gusto moeskapo. Nabalhin na sila sa pikas prisohan man god," tug-an ni Gudin.

Nakatakda na nga ihatod sa rehabilitation center ang duha ka mga batan-on samtang ibutang na usab sa prisohan didto sa Barangay Canocotan sila Gudin ug Salas.

"Nobody can undermine the dedication and compassion of the police. Dili kini ma-question tungod lamang kay dunay kahuyangan ang ubang pulis," reaksiyon ni Police Inspector Anjanette Tirador, tigpamaba sa Tagum City Police, dihang nakahinabi sa Superbalita. Domilyn Ramos-Pico