DAGHANG impormasyon sa social media ang mikatag nga dunay mga delegado, sa nagpadayong Philippine Councilors League(PCL), ang milapas sa speed limit ug anti-smoking ordinance sa Dakbayan sa Davao.

Usa mga nabalita nga nakalapas sa speed limit mao ang drayber ni PCL National Chairperson Alma Moreno, apan dihang gisusi sa Sun.Star Davao Superbalita ang kapulisan, wala sila'y nadawat nga report.

Gawas sa speed limit, duna say gi-ingon nga mga konsehal nga nasakpan nga nanigarilyo sa publikong lugar nga gidili sa Anti-smoking Ordince sa dakbayan.

Sanglit sakop sa area of responsibility (AOR) sa Sta. Ana Police Station ang SM Lanang diin gihimo ang PCL meeting, gikuha ning tigsuwat ang pahayag ni Police Superintendent Royina Garma, hepe sa presinto uno.

"So far, wala pa kaming natanggap na report na nag-violate," sulti ni Garma.

Ang opisyal misulti nga dunay mga nadakapan ang kapulisan apan yanong indibidwal lamang, di mga konsehal nga sakop sa PCL.

"Actually, sinabihan na silang lahat doon sa convention kahapon (Miyerkules) kung ano ang mga batas dito sa Davao, kaya alam na nila kung ano ang dapat gawin dito," sulti ni Garma.

Sanglit di malikayan nga dunay mga delegado nga mosuroy sa mga nindot nga lugar sa dakbayan duol lamang sa ilang gi-istaran nga mga hotel, gi-ingon sa opisyal nga maniid sab ang iyang kapulisan.

"Iikot talaga ako mamaya para manghuli ng mga delegates na mag-violate," saad ni Garma.

Ang tigum sa PCL dinhi sa dakbayan, nga gitambongan sa 3-mil ka mga delegado, mahuman karong adlawa, Hunyo 12.(Alger P. Dura)