LAING kalampusan ang nahimo sa Pinoy Aquaman ug environmental Lawyer nga si Ingemar Macarine dihang nahuman niya paglangoy ang Chesapeake Bay diha sa Estados Unidos niadtong Martes, Miyerkules dinhi sa Pilipinas.
Si Macarine mao ang labing unang Pinoy nga nakalangoy sa open water sa maong bay diin gilangoy niya kini sulod lang ang 2 ka oras ug 58 minutos.
Nagsugod paglangoy si Macarine pasado alas 9 sa buntag sa maong adlaw diin diha siya nagsugod sa Bay Bridge Marina ug gilangoy niya ang Kent Island paingon sa Sandy Point Beach sa Annapolis, Maryland sa Estados Unidos.
Mokabat 8.1 ka kilometro ang paglangoy ni Macarine sa maong dagat diin siya mao usab ang labing una nga Pinoy nga nakalangoy sa Atlantic Ocean.
Mao na usab kini ang ikaduha nga higayon nga pagsawom ni Macarine sa mga dagat dinha sa United States.
Una niini mao ang pagsawom niya sa 2.8 kilometer nga Alcatraz channel paingon sa San Francisco City niadtong Abril sa miaging tuig.
Tumong ni Macarine mao ang limpyo nga dagat ug baybayon dinhi sa nasod ug alang sa tibuok kalibutan.
Si Macarine kinsa lumad nga taga Surigao City kasamtangan nga Election officer karon sa Tubigon, Bohol.
Siya usab ang nagmugna sa Surigao Runners Club ug miyembro usab sa Triathlon Bohol, Team Solomon Running, ug Triathlon Surigao.