MOPUSIL ang Cleveland Cavaliers og 3-1 karong adlawa sa Game 4 batok sa Golden State Warriors atol sa ilang best-of-seven NBA Finals.

Nabali ang hangin karon nga gikan sa pagkadehado ang Cavaliers, karon nahimong inilog.

Dakong suliran ang nadawat sa Cavaliers sa playoffs pa lang diin napugos si Kevin Love nga dili makadula tungod sa iyang shoulder injury ug nasundan dayon kang Kyrie Irving sa iyang knee cap injury sa Game 1 sa Finals.

Apan ang bench sa Cavaliers nga sila si Matthew Dellavedova, Timofey Mozgov ug James Jones nipakita og gilas.

Matod pa ni NBA legend Isiah Thomas sa postgame analysis human sa 96-91 nga kadaogan sa Cavs sa Game 3 nga si Dellavedova ang importante nga player sa Cavs sa siris.

Nihuman si Dellavedova og 20 puntos sa maong kadaogan ug mao pa ang nisalbar sa Cavs sa Game 2 katong nakakuha siya og foul sa kulbahinam nga segundos nabilin sa Game 2 aron mabutang sa penalty line, diin napasulod niya ang duha niya nga freethrow aron molabaw ang iyang team.

Si Mozgov, center sa Cavs, nipatak og 17 puntos sa Game 2 ug dili makumpyansaan sa ilalom sa iyang cut-in. Si Jones sab nakaayuda sa ikatulo nga kwarter sa Game 3 diin nibinat ang Cavs og 20 puntos nga labaw.

Sa depensa sab, nalimitahan sa Cavs si Klay Thompson og 14 puntos sa kataposan nga dula nga mahinumduman nga nangulo kini siya og 32 puntos alang sa Warriors niadtong Game 2.

Matod sa komentarista sa NBA nga krusyal kuno sa duha ka team kung makakita sila og ‘rhythm’ sa dula.