NAHATAGAN sa KIA Carnival og ikaduha nga kapildehan ang Barako Bull Energy, 71-68, atol sa ilang dula sa 2015 PBA Governor's Cup niadtong Miyerkules sa gabii didto sa SMART-Araneta Coliseum.
Nibira og 15 puntos si Jeff Chang alang mangulo sa Carnival, samtang nipatak sab si LA Revilla og 10 puntos ug lima ka assist.
Sila si Hans Thiele ug Hyram Bagatsing niayuda sab og siyam ka puntos matag usa.
Hugot nga panagkombati sa duha sa ikatulo nga kwarter hangtod sa kataposan.
Nagtabla ang duha sa 67-tanan human sa slam dunk ni KIA import Hamady N'Diaye sa 3:08 minutos nabilin sa dula.
Hangtod, nakakita og break ang KIA kang Bagatsing sa iyang jump shot aron molabaw, 69-67.
Apan namugnaw ang Bulls diin wala na-convert ilang duha ka possession ug niangkon pa og usa ka turnover.
Igo lang sila nibalos pinaagi sa usa sa ka freethrow ni Liam Paul McMarrow.
Nasilyo sa KIA ang kadaogan sa tagsa nga freethrow nila ni Virgil Buensuceso ug Bagatsing.
Nibugkos na ang Barako sa ikaduha nga pwesto ubanan sa Alaska Aces nga adunay unom ka daug ug duha ka pilde matag usa.
Tungod sa kapildehan sa Bulls, ang San Miguel Beermen naguna karon nga adunay pito ka daug ug duha ka pilde human sa ilang pito ka sunodsunod nga kadaogan gikan sa duha ka pilde pagentrada nila sa Governor's cup.
Ang Carnival anaa sa ikaupat nga pwesto nga adunay upat ka daug ug tulo ka pilde.
Sa pikas dula, naangkon sa Rain or Shine Elasto Painters ilang ikatulo nga sunodsunod nga kadaogan human nila napanitan ang NLEX Road Warriors, 106-102.
Nangulo si Wendell McKines sa Elasto Painters sa iyang 33 puntos ug 20 rebounds, samtang nidugang si Paul Lee og 20 puntos.
Nakatagamtam ang Painters og 29 puntos nga labaw sa ikatulo nga kwarter, 84-55, apan nahinayhinayan kini og putol sa Road Warriors aron modikit sa dula sa kataposan nga kwarter.
Nakontrolar kini sa RoS aron moangat sa ikalima nga pwesto duyog sa Meralco Bolts ug Global Port Batang Pier nga adunay upat ka daug ug upat sab ka pilde matag usa.