SECTIONS
Wednesday, September 18, 2019

Luzano: Panawen sa manen dagiti trahedya!

KANNAWIDAN nga iti uneg ti Kuwaresma wenno Nangina Nga Aldaw... adda latta dagiti mapaspasamak a trahedya. Kas koma adda dagiti malmalmes kadagiti resorts; maak-aksidente kadagiti lugan ken kaarngina a pasamak. Ngem amangan ta adu ti maklaat no uray idi Huebes Santo ket imbes a nagngilin dagiti bandido nga Abu Sayyaf... nangpakgedda (pugot ulo) ketdi iti maysa a kadaraantayo. Nakaam-ames, saan aya, pards? No adda man idi naipadpadamag a napatgedan, gangannaet dagiti biktima. Ngem ita a gundaway, maysa a mangngalap piman ti biniktimada gapu ta saan a nakaited iti kiddawda a P5-M ransom. Piman met daydi Noel Besconde, maysa a kapitan ti fishing boat a hinostage ti ASG. Daytoy ket napasamak sadiay Patikul, Sulu. Malagip a ni Besconde ti maysa kadagiti uppat a tripulante ti F/B Ramona a dinukot dagiti bandido iti deppaar ti Celebes Sea idi Disyembre 2016. Ket kas gagangay, uray pay kadagiti naglabas a rehime... tunggal adda aramiden dagiti Abu Sayyaf... kanayonda nga ikari a PULBUSENDA dagitoy a bandido. Naulit manen iti agdama ti pangta a masapul a mapulbosen ti sibubukel a puwersa ti ASG. Kararag: sapay koma ta pumudnon apo dayta a pangta iti sidong ti Duterte Administration. Adun ti nauma ken saanen a mamati iti dayta a pangta a PULBOS. Ngamin, kadagiti naglabas a panawen... imbes a maksayan ti bilang dagita a bandido... kasla umad-adudan sa met. Amangan, kunada, ta iti tunggal sangapulo a mapapatay iti rinnupak, adda sangagasut a maisukat. Dayta koma ti bantayan dagiti otoridad. Aramid ti ur-urayen ti umili, saan a puros pangta ti PULBOS. Amen!

*****

Itay kallabes a Semana Santa, saan gayam a nag-recess wenno naginana ti Oplan Tokhang wenno operasyon kontra illegal a droga. No ditay agrero, kas report ti maysa a pagiwarnak... adda kano nasurok tallupulo ti napapatay gapu iti droga iti dayta a panawen. Mabalin a naidulin ti nakuna a report. Ngem iti biangmi... aniaman a paniempo, masapul nga agtultuloy latta ti kampanya ti gobyerno kontra illegal a droga. Kinapudnona, sipud nairugi daytoy idi nagtugawen kas president ni Apo Duterte... addan nasurok sangapulo ribu ti napapatay nga addaan pannakainaig ti illegal a droga. Adda met nasurok sangagasut kano dagiti suspects a napapatay kadagiti lehitimo nga operasyon gapu ta limmabanda kadagiti otoridad. Rinibu metten dagiti simmuko , naaresto, nabalud ken narehab. Itay laeng nabiit, addan gasut dagiti nagturpos iti rehab nupay adu pay ti madama. Malagiptayo ti kugsil idi ni Apo Digong a dinanto sardengan ti kampanyana kontra droga agingga’t adda pay laeng dagiti drug lords. Eggem pay laeng ni Presidente, PNP, DILG ken local govt. units ti Narco List. No ania ti mapasamak kadagita a nakalista... makitanto kadagiti masungad nga aldaw. Mamatitayo a marespeto ti karbengan dagitoy. No makalusotda iti atap, sapay koma ta madalusan met ti naganda iti sosyodad. Adu ngamin dagiti nainagananen nupay dipay nagna ti umno nga imbestigasyon. Ti pagamkan ti kaadduan: napaneknekan kadin a positibo ti report iti pannakairamanda iti Narco List? Wenno aramid laeng dagiti tao a kayatda ti mangdadael wenno bumales? Kasanon ti reputasyon ti kinatao ken pamilyada kas pangarigan ta sablay ti report? Karbenganda ti mangirupir iti kalinteganda a namulitan gapu iti parbo a pammabasol. Mamatikami iti kinadalus ti proseso nga isaysayangkat ti Duterte Administration. Agtalekkami.

*****

Malagipko manen daydi lolok. Istoryana ngamin nga idi kano panawen ti gubat wenno libong-libong (kunada)... adu kano a kailiantayo ti kimmita iti pirak (kuarta ti Hapon) iti dayta a panawen. Ti trabahoda, agitudo laeng no sinno dagiti kontra-Hapon. Mapapatay dagiti piman a naitudo uray inosente met kano dagitoy. He he... amangan ta dika laeng pinautangan, intudonakan kadagiti sakang. Hayy biag... sapay koma ta saanen a mapasamak ti kasta iti daytoy a panawenmi, lolo. Ngem guray... kasla... mabalin met a mapasamak nangruna iti kampanya iti illegal a droga, saan aya? Adda laeng sakit ti nakemna iti maysa a tao, wenno gapu iti apal a dakes... ipannakan ikissiim kadagiti otoridad ket atapendakan a usher wenno pusher wenno Lord. Wen, aya, pards. Mabalin gayam a mapasamak manen ti killo nga aramid idi panawen ti gubat. Nangruna no adda katukadna dakkel a kantidad. Maryusep! Sapay koma ta dagita nga atiddog ti dila ken tammudona ti matokhang, arasaasda. Isu a subliak manen ti nakunami itay: adda talekmi iti Duterte Administration. Estigosanto!

*****

Subliantayo dagiti trahedya kadagitoy a panawen. Idi Sabado de Gloria... maysa a Korean-American a naaresto gapu iti illegal a droga ti nakalibas manipud iti maysa a pagagasan a nagpaoperaanna iti acute appendicitis. Maryusep! Kasano a napasamak ken sinno dayta nakalibas a natokhang? Babaen iti report ti pulisya, ti suspect nga Korean-American ket managan Jun No alyas Jazz. Naaresto idi Abril 5 iti parking lot ti seaside Boulevard sadiay Pasay city gapu iti panagilakona iti 140 a pidaso ti ecstacy tablet. Idi Abril 10 bayat ti physical ken medical examination kenkuana tapno mayakaren daytoy iti PDEA Jail annex ti Bicutan... nakarikna kano daytoy iti nakaro a sakit ti tiyan. Naitaray iti PNP General Hospital sadiay Kampo Krame sa naiyakar manen sadiay East Avenue Medical Center. Dita a naoperaan ti apendixna. Dua ti guardian. Maysa a taga-PDEA ken maysa met a taga-PNP-DEG (Drug Enforcement Group). Iti oras nga alas sais iti agsapa ti Sabado de Gloria, nakaturog ti taga-PDEA ken napan met gimmatang iti pagarmusaranda ti taga PNP-DEG. Ditan a naglibas ni Jun No. Kasla nakatiliwka iti dalag, ngem nakabulos manipud iti alat. Tsk tsk. Nakastigo dagiti guardian. Ngem sibubukel manen a PNP ti kababain, saan aya? Dayta ti derekta a trahedya, pards. Piman a PNP, kunada. Kakaasi met a mangdaldalus iti naganna. Adu met latta dagiti etta ken riper iti grupoda. Natural, agkudkod manen ti ulo da Digong ken Gen. Bato.

*****

Mano nga aldaw laeng ti napalabas kalpasan a nagngudo ti Semana Santa... maysa manen a trahedya ti napasamak. Daytoy ti pannakatnag ti Leomarick Trans Bus iti rangkis ti Carranglan, Nueva Ecija idi Abril 18, pasado alas diyes ti agsapa... a nakatayan ti 31 ken pannakasugat ti 46 (kaudian a report iti pannakaisursurat daytoy nga espasyo). Aksidente ti napasamak. Agsisimparat manen dagiti natakuatanda a rasones iti trahedya. Adda agkuna a nagrero ti driver. Adda agkuna a naawanan ti preno ti lugan. Adda nagkuna a daanen ti bus. Sige, unaenyo pay dagiti pagkasapulan dagiti natrahedya sakbay iti pinnabasol. Ngamin, adun dagiti aksidente ti lugan ti napasamak. Kinse nga estudyante ti natay idiay Tanay, Rizal itay nabiit gapu iti nadisgrasya a tourist bus. Daanen kano daytoy, kuna ti LTFRB. Saludsod: aniangay ti ar-aramiden ti gobyerno iti kakasta a rasones ti trahedya? Awan kadi’t ngipen ti linteg a mangkondena kadagita nga operasyon ti transportasyon nga addaan panaglabsing? Wenno nalaingda laeng nga agkutak no adda aksidente. Ngem kalpasanna, subli-normal manen ti operasyon? Saan ngata a gapu iti sileng ti pirak no apay nga adda dagiti MABUNGI KEN MABUNGAL a linteg ditoy pagilian? Agsalsaludsodkami laeng apo. Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph