USA ang patay samtang lima ang samdan sa mga sundalo atol sa engkwentro nga nahitabo niadtong Miyerkules sa lungsod sa Kibawe, Bukidnon.
Kini ang gikumpirmar ni Lt. Col Jessie Alvarez kinsa Commander sa 4O3rd Brigade sa 4th Infantry Division-Philippine Army (4ID-PA).
Gibutyag niini nga ang engkwentro gilangkuban sa iyang mga sakop ubos sa 8th Infantry Battalion ug New People’s Army nga gitouhang sakop sa Guerella Front 53.
Matud ni Alvarez nga aduna silay nadawat nga report nga adunay presensya sa mga NPA sa bukid nga bahin sa maong lungsod human gikatahong nagkampo na sa dapit nga maoy hinungdan nga nagpatrolya ang mga sundalo.
Dihang nakumpirma ang ilang presensya miresulta sa pila ka oras nga panag-engkwentro.
Patay ang usa ka sakop sa sundalo ug lima ang samdan nga dili pa mapanganlan ni Alvarez ning panahona agi og respeto sa ilang pamilya nga kasamtangan pa nga gipahibalo.
Matud ni Alvarez nga narekober usab ang improvised explosive device (IED) sa dapit nga gipanag-iyahan sa walhong pundok nga gibana-banang anaa sa 40 ka tawo.
Nakita usab sa dapit ang nagkatag nga dugo nga gituohang gipanag-iyahan sa misibat nga mga NPA ug gani gitouhang aduna gyod samaran sa ilang parte.
Hinuon gibutyag niini nga dili grabe ang samad sa naangkon sa lima ka mga sundalo ug kasamtangan pa nga giatiman sa ilang 4ID headquarters.
Padayon usab ang operation sa dapit ning panahona aron paggukod sa mga walhong pundok.