GIBASOL ni Philippine Athletics Track and Field Association (Patafa) president Philip Ella Juico ang nag-supply sa uniforms sa national athletics team bali nga pagkabutang sa Philippine flag nga maoy nakapakontrobersiya sa kadaugan sa sprinter nga si Kayla Richardson ug Eric Cray sa Southeast Asian Games.

Matod ni Suico nga ang supplier kinsa wa lang una ibutyag ang ngan sa kompaniya, na­ngayo na gani niya og despinsa sa nahitabo ug miangkon kini sa maong kasaypanan.

Si Richardson ug Cray maoy miharos sa century dash gold medals ug didto nabantayi nga ang bandera sa Pilipinas nga nahimutang sa ilang uniform nabali diay.

“This was an error of the supplier which we have corrected,” padayag ni Juico. “The supplier is making a public apology accepting the fact that they made a mistake.”

Giklaro usab ni Juico nga dili tanang uniporme ang nabutangan og baliktad nga bandera ug gipaniguro nga gihimo na karon ang pagkorheir niini ug gani sakto na man ang uniporme ni Cray sa dihang midaog kini sa 400-meter hurdles niadtong Miyerkules.

“It got inverted in a few uniforms, and not in all. It is being corrected,” ingon ni Juico.

“Mga apat or lima,” padayag ni Juico sa dihang gipangutana kon pila gyud ka uniporme ang nabutangan og bali nga bandera. “We just got another flag.”

Hinuon gikasagmuyo gyud ni Juico nga ang kontrobersiya maoy mi­tabon sa impresibong performance sa athletics team sa maong kompetisyon.