NAGBITAY sa punoan sa kahoy ug gituohang naghikog ang usa ka lalaki nga napalgan niadtong Miyerkules mga alas 2:00 sa hapon sa Purok-9, Sitio Bugna, Barangay Casinglot, lungsod sa Tagoloan, Misamis Oriental.
Si PS/Insp. Maricris Mulat, hepe sa Tagoloan Police Station niingon nga hangtod ning panahona wala pay identipikasyon ang biktima.
Nanawag sa ilang buhatan ang barangay kapitan sa dapit ug misulti nga adunay nakita nga patayng lawas sa dapit nga nagbitay sa punoan sa kahoy.
Tungod niini miresponde ang iyang mga sakop ug ilang nakumpirma ang taho.
Nakita kini sa barangay tanod nga mao si Artemio Ubanan.
Ang biktima gituohang bag-o pa nabugtoan sa kinabuhi ug anaa pa sa upat ka oras gikan sa paghikog.
Gihulagway ni Mulat ang biktima nga nagsul-ob og pula nga t-shirt, maong nga kolor blue, itom nga sapatos, anaa sa pangidaron nga 20 ngadto 30 anyos, adunay katas-on nga 5’3 ngadto 5’4 ug insakto lang ang pamanit.
Nanawagan si Mulat nga kung kinsa man ang nawad-an og sakop sa pamilya nga susihon kini sa Everlasting Funeral Homes ning panahona hilabi na nga walay bisan kinsa nakaila niini sa ilang dapit.
Samtang girekomendar niini nga ipaubos sa otopsiya ang patayng lawas aron masuta nga walay foul play sa kamatayon niini.