MOKABAT ngadto sa P340,000 nga alahas ang gituohang gikuha sa katabang niadtong Miyerkules mga alas 5:30 sa hapon sa Barangay 26 ning siyudad sa Cagayan de Oro.

Gihatod ngadto sa kapolisan sa Police Station 3 sa Agora sa biktima nga si Iluminada (apelyido gipugngan), 73, balo ug lumulupyo sa nahisgutang dapit uban sa anak niini ang suspetsado nga usa ka 17-anyos nga naila nga si Erika (apelyido gipugngan), taga Claveria, Misamis Oriental.

Gibutyag ni Iluminada sa pakighinabi sa Sun.star Superbalita nga wala pa nag 24 oras ang maong suspetsado sa iyang poder.

Ang suspek lamang ang nabilin sa balay niadtong higayona tungod kay niadto sa simbahan ang biktima apan sa pagpauli na niini abli na ang door knob sa lawak nga gituohang gituyo pagguba ug nasutang nabungkag na ang mga gamit ug nahanaw na ang mahalong mga alahas.

Gibutyag ni Iluminada nga samtang naa pa siya sa simbahan nag-text kaniya ang batan-on nga mopauli kay gipapauli siya sa iyang inahan apan wala siya nisugot tungod kay ang ilang sabot mopauli kini kung makabalik na ang una niini nga katabang.

Lakip sa nahanaw nga alahas sa biktima ang usa 24k Italian gold necklace nga nagkantidad og P200,000, usa ka Diamond ring (P120,000) ug usa ka pares sa Diamond earring (P20,000).

Ang menor de edad nga suspetsado kasamtangang anaa sa kustodiya sa kapolisan ug pursigido ang biktima nga mopasaka og kaso.