Aliwagwag Falls gisirad-an kay nag-giyera

ANG kasundalohan sa 10th Infantry Division sa Philippine Army, naghangyo sa lokal nga kagamhanan sa Davao Oriental nga temporaryo unang sirhan ang tourist site sa Aliwagwag Falls aron masigurong luwas ang lugar luyo sa pagpanghasi sa New People's Army (NPA) alas 4:30 sa kaadlawn, Abril 22.

Sa programang, "The Defender sa dxAB Radyo Patrol 1296", gibutyag ni 10th ID spokesperson Captain Rhyan Batchar nga temporaryo unang wa gipasudlan og mga bisita ang tourist site sa Aliwagwag Falls gumikan sa nahitabo.

"Temporarily closed una sa mga mobisita didto [Aliwagwag Falls] para ma-secure una nato ang lugar," tipik sa pahayag ni Batchar.

Gipanawagan ni Batchar ang publiko nga i-kansela una ang mga plano nga mobisita sa lugar gumikan ipahiluna pa sa kasundalohan ang dugang puwersa pinaagi sa ilang Community Support Teams.

"Sa mga nag-plano nga moadto didto, no exchange of pleasure nga moadto mo didto nga despite nga naay nahitabo," sumpay ni Batchar.

Nasayran nga gipangrapido ang mga sundalo nga nagbantay sa tourist site nga miresulta sa pagka-angol sa usa ka sundalo.

Sa usa ka oras nga sinukliay og bala tali sa gituohang 40 ka mga sakop sa NPA ubos sa Secom20 sa Southern Mindanao Regional Command.

"That time ang mga visitors nga duol sa dapit, nanganaug sa sentro sa Cateel," ingon pa ni Batchar.

Sa Facebook post ni Ryan Ang, iyang gisaysay ang ilang kasinatian dihang nakamata sila sa mga buto sa armas human sila nagpabuntag sa dapit aron hulaton unta ang pag-abli sa Aliwagwag Eco Park.

"We were sleeping in our vehicle on the parking bays while waiting for the park to open at 8, then around 4:30am, a sudden loud, rapid, and continuous volley of fire erupted... bullets wheezing above our heads and we can hear crackling sounds of the trees, probably when hit by bullets. Us and together with the other groups that arrived early dawn scampered for safety," saysay ni Ang sa iyang post.

"This attack is a wanton disregard of the people's safety and source of livelihood, showing once more the anti-people and anti-development character of the nuisance propaganda army (NPA) of the communists," pahayag ni Major General Rafael Valencia, commander sa 10ID.

Usa ka M14 rifle ang narekober sa kasundalohan sa lugar samtang ang nasamdan nga sundalo gidala sa duol nga ospital sa dapit.

Sa pagsuwat ning balita, kapulisan sa Cateel Municipal Police Station ug kasikbit nga probinsiya uban ang kasundalohan nagpahigayon og clearing operations samtang ang tourist site temporaryo unang gisirhan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph