WA na man untay pasudlon nga fixer sa buhatan sa LTFRB 7, apan kining ginganlan og Jesse Tabanao usa ka operator og taxi ug mga PUJ. Isip operator, makasulod siya kay kintahay dunay mga papeles nga gi-follow up. Kagahapon sa udto, nalit-ag kini.
Nagkanayon si Regional Director Ahmed Cuizon sa Land Transportation Franchising and Regulatory Board kun LTFRB nga wa gyud siyay gipang-aprub nga mga bag-ong prangkisa tungod sa usa ka nasudnong moratorium.
Apan atong nasayran nga kining maong fixer giingong nipasalig sa iyang mga kliyente nga molusot ang mga prangkisa kon mobayad og P300,000, ang katunga maoy down payment.
Maayo na lang kay duna kiniy mga nabiktima nga nidesisyon nga moreklamo ug kagahapon gipahigayon ang usa ka joint entrapment operation sa LTFRB ug ang National Bureau of Investigation (NBI).
Nasikop kining operator og sakyanan nga si Tabanao. Gi-pickup sab sa mga elemento sa NBI nga gipangulohan ni Arnel Pura, ang usa ka empleyado sa LTFRB nga gi-implicate sa complainant.
Atong nasayran nga dihang nasikop na kining maong fixer, dunay dugang mga reklamante nga niduol sa NBI.
Kahinumdoman, si Director Cuizon gidayeg ni LTFRB Chairman Martin Delgra kay wala kiniy record nga nipirma og bag-ong franchise. Ang ubang mga director nga nasakpang dunay mga gipangpirmahan naputbol dayon.
Bugas
Ambot niining administrator sa National Food Authority (NFA) nga si Major Jason Aquino. Ni-report kini nga moabot og 99.86 porsiyento sa mga importer sa bugas nga ni-avail niining 2016 Minimum Allocation Volume (MAV) program ang ni-advance og bayad sa customs duties pinaagi sa Land Bank of the Philippines.
Kay duna pa may pipila nga mga shipment nga wala makaabot sa deadline nga Pebrero 28, 2017, nimando ang NFA Council nga dunay extension ngadto sa Marso 31, 2017.
Apan unsa bang pagka-unsa-a nga wa man momando si Aquino og extension sa tanang mga naulahi. Gipili man lang niya ang iyang gihatagan og mga import permit.
Ug iyang giingnan si Commissioner Nick Faeldon sa Bureau of Customs nga dakpon ang mga shipments nga naulahi ug dili gikan sa India ug Pakistan.
Ang kasagaran baya nga nahabilin kay gikan sa Thailand ug Vietnam.
Usbon ko nga nakabayad na sila og advance kay naka-avail sa MAV program sa pag-import og bugas. Karon, wa sila hatagi og import permit ug giisip na hinuon nga smuggler sa Bureau of Customs.
Lalim bay ubay-ubay gyud ang recommended for seizure karon nga gipanag-iya sa Pilmico Food Corp. nga usa ka lehitimong kompanya sa Aboitiz group? (@anol_cebu sa Twitter)