IPAHIGAYON gikan sa Hunyo hangtud sa Septyembre 2017 ang mid-term evaluation study sa Philippine Rural Development Project (PRDP).
Unom ka tuig kini nga anti-poverty alleviation program nga mokabat og P27.5 bilyon nga utang sa World Bank (WB) ug giimplementar sa Department of Agriculture (DA) nga nagsugod niadtong 2014 ug mahuman sa tuig 2021.
Usa kini ka plataporma sa gobyerno sa katukuran sa moderno ug "climate-smart agriculture" ug paglig-on sa partnership sa provincial local government units ug agri-fishery stakeholders aron makab-ot ang tumong nga "improved food security" sa nasud.
Buot sa maong programa nga motaas ang kinitaan sa katawhan sa kabanikanhan ug modako ang ilang produksyon gikan sa uma o sa panagat.
Mao kini ang atong makita nga mga proyekto sa probinsiya sama sa farm-to-market roads, production and post-production facilities ug uban pa nga gikan sa DA.
Aduna kini'y upat ka components sama sa Local and National Levels nga nisuporta nga mahimong epektibo ang DA sa pagtabang sa mga probinsiya nga matuman ang ilang plano sa pagpalambo sa kaumahan ug kadagatan.
Anaa sab ang Infrastructure Development nga nagmugna og kutay sa abot ug ani sa mga probinsiya ngadto sa merkado pinaagi sa pagtukod og mga climate-resilient rural infrastructure facilities sama sa tulay, fish landing, potable water system, communal irrigation system, fish sanctuary.
Ang ikatulo nga component kay ang Enterprise Development nga buot mopalambo sa mga rural agro-industries pinaagi sa paggahin og kapital ug uban pang suporta gikan sa gobyerno ug pribadong sektor. Ang ikaupat nga component mao ang Implementation Support nga magduso og mga kausaban sa paagi ug reporma sa epektibong suporta implementasyon sa programa.
Aduna kini upat ka project support services sa Luzon A, Luzon B, Visayas ug Mindanao.
Ang pagrepaso sa PRDP gikinahanglan kaayo sa WB aron mahibal-an kung angayan bang ipadayon ang proyekto ug kung naa bay usbon aron makab-ot nga kausaban nga gihandom sa pagsugod niini.
Tan-awon dinhi kung sakto ba ang paggahin sa pundo ug nakabenepisyo ba ang katawhan sa kabanikanhan sa maong programa.
Kung wa ko masayop ang PRDP maoy gisundan sa Southern Mindanao Agricultural Program (Smap) ug duha ka hugna nga Mindanao Rural Development Program (MRDP 1&2) nga gipundohan kaniadto sa European Union ug WB.
Sa akong kabahin, nindot nga lantawon kining maong programa nga nasugdan sa administrayon ni PNoy ug kung motukma ba kini sa plano sa administrasyon ni PRody.
Para kanako lantawon usab sa maong ebalwasyon ang resulta sa nangaging Smap, MARDP 1 & 2 kung tinuod ba nga nakatabang kini sa katawhan ilabi na nga utang kini sa Republika sa Pilipinas. Tiaw mong P20.5 bilyon (75 porsyento) niini gikan sa utang samtang ang P287 milyon (1 porsyento) gikan sa Global Environment Facility ug ang P6.7 bilyon (24 porsyento) gikan sa panudlanan sa nasyonal ug lokal nga gobyerno.
Angayan natong bantayan kining maong proyekto kay basin mapareha kini sa fertilizer scam nga anaay listahan sa nakadawat apan way niabot. May litrato sa tulay apan putol. Unta magtuki kita sa proyekto sa gobyerno kay kuwarta kini ni Juan ug Juana.