MATI City, Davao Oriental-- Si International champion Sonny Boy “Yogi” Aporbo maoy mihari sa expert division title sa Visit Davao Fun Sale National Skim Boarding Competition dinhi sa Amihan sa Dahican.
Ang taga-Mati kinsa mikampeyon sa 10th International Skim Boarding Competition 2016 sa Malaysia, nagpakitang gilas sa iyang 360 big spin ug 540 wrap around spin.
Gipildi niya sila Jesus Ortiz ug Mani Dalamas, kinsa ikaduha ug ikatulo sa maong han-ay sa kalihukan nga gipresenta sa Department of Tourism ug local government unit sa Mati City.
Malipayon si Aporbo nga mihatag siya og dungog sa iyang lugar.
"Dili mabayloan akoang kalipay nga nag-champion ko diri. Stoked kaayo!" sa pakighinabi kaniya sa SunStar Davao.
Apan giangkon niya nga nakulbaan siya sa finals, "Nakulbaan ko'g kalit kay daghan tawo nagtan-aw sa akoa ug kabalo ko na nagsalig sila nga ako ang modaug."
Nadawat ni Aporbo ang P25,000 ug gift pack gikan Bonamine-Tempra samtang ang runner-up nabulsa ang P15,000 ug ang ikatulo miuli og P10,000.
Ang manghud babaye ni Aporbo, Julieta, midomina sab sa wahine category samtang si Joven Dawang midaug sa beginner's class.
Samtang si Anjot Catubig mibulsa sa titulo sa advance category.
Ang Amihan sa Dahican ug ilang scholars makabenepisyo sa maong torneyo.