TUNGOD sa iyang impresibong gipakita sa Game Three niadtong Miyerkules, hayan mahatagan na unya og taas nga playing time si David Lee sugod karong buntag sa Game 4 sa NBA Finals.
Pildi man tuod sa niaging duwa, apan na-impressed si Golden State Warriors coach Steve Kerr sa gipakitang labok ni Lee kinsa mirehistro og 11 puntos, upat ka rebounds, duha ka assits, ug usa ka steal, way sipyat sa field goal sa 13 minutos sulod sa korte.
Sa unang duha ka duwa, gibanko si Lee kinsa maoy pinakamahal nga player sa Warriors ug gihugonhugonan nga posibling i-trade sa Warriors.
“David was terrific,” pagdayeg ni Steve Kerr human sa ilang 96-91 nga kapildihan. “David helped us big time get back into that game ... You’ll see more of David Lee. He played really well.”
Sa first half, gipaduwa lang si Lee sulod sa tres minutos apan gibalik kini sa fourth quarter sa dihang nabiyaan na ang Warriors, 72-55.
Usa siya sa nakasuporta ni Stephen Curry sa katapusang tres minutos sa dihang nasikit na og maayo ang Golden State.
“David was special,” padayag ni Klay Thompson. “He was ready to play. He made the most of his opportunity. When Steph got trapped at the top of the key, David would roll right to the elbows and be aggressive with the ball. And that’s what we need.”