Davraa lawn tennis mi-reyna sa Palaro

SAN JOSE, ANTIQUE -- Mikampeyon ang Davao Region Athletic Association (Davraa) secondary girls sa lawn tennis competition sa nagpadayong Palarong Pambansa 2017 sa Binirayan Sports Complex, San Jose Antique.

Gipildi nila Danna Mariela Abad ug Winona Cabardo sa Sta. Ana National High School, Nicole Ann Bautista sa Ateneo de Davao University ug Patricia Velez sa Precious International School ubos ni Coach Hazsher Munjilul ang Region 4-A sa iskor 2-1 alang sa team event.

Gipahayag ni Patricia nga nagtinabangay sila aron modaug.

"Di kami mag-gold kung di kami lahat nagtulungan, kapag kasi ang team isa lang yan eh, kung buo ang puso na manalo, mag-gold talaga."

Mapasigarbuhon si Coach Hazsher sa iyang gigiyahan nga grupo.

"Proud ako kasi first time ko mag-coach sa kanila. By God's will na mag-gold sila lahat, taas akong pagsalig sa ilaha."

Samtang sa individual event, midaug si Patricia batok Ilocos Region sa iskor 8-1.

Sa DASJMS Covered Court San Jose Antique, abante sa semifinals ang Josefa Llanes Escoda Elementary School-Maa, Davao alang sa sepak takraw elementary boys competition.

Una nilang gipalukapa ang Cordillera Administrative Region (CAR) sa iskor 21-9;21-19 dayon gisunod og biktima ang Armm sa iskor 21-8;21-9.

Sunod makalaban sa Davraa tim ubos ni Coach Ronnie Dayigdigan ang Ilocos Region alang sa cross-over semifinal padulong sa kampeyonato.

Samtang padayon sa paghakot og kadaugan ang Davraa sa futsal secondary girls sa Hamtic Basketball Court human gilampaso nila ang Eastern Visayas Region, 7-2.

Parehong dunay tigduha ka goals sila Joyce Semacio ug Patricia Erika Francisco samtang mihatag og tag-usa ka goal sila Julienne Meredith Mirto, Joannah Marie Adao ug Shanelle Charllyne Ostan.

Sa softball secondary girls, duha na ang pildi sa Davao gikan sa Western visayas 2-3 ug CAR, 4-5 sa Camp General Leadro Fullon, San Fernando, San Jose Antique. (Marizz S. Robilla)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph