USA ko sa mga biker nga gidapit ni Konsehal Nida Cabrera sa pagtambong sa ribbon cutting sa bike racks nga gipaninguha sa iyang komitiba nga mabutang sa parking area sa city hall. Nagkuyog mi sa akong higalang folding bike collector ug negusyanteng si Jay Garganera sa pagtambong.
Among gikakita ang among mga kauban sa Tindak Sugbo bike coalition. Gikahimamat usab nako ang head sa Visayas-Mindanao sa Smart Communications Public Affairs Atty. Jane Paredes.
Ang bike racks nga gipintalan og yellow gipagama sa Smart Communications isip tipik sa ilang corporate social responsibility nga gitumong alang sa pagpreserbar sa kalikupan. Giatol ang pagsubo sa bike racks sa Earth Hour kagabii.
Si Bise Mayor Edgardo Labella nga nitambong ug nangulo sa kalihukan nisulti sa kamahinungdanon sa bike racks aron pagdasig sa katawhan sa pagbiseklita. Matod niya nga sila si Konsehal Cabrera nakatambong og kalihukan sa miaging tuig nga nagtuki sa kalikupan. Ilang nakita nga ang modernong mga nasod nagduso sa alternatibong transportasyon nga maayo sa kalikupan. Usa niini mao ang biseklita.
Kaayuhan sa biseklita
Matod ni Labella nga usa sa mga hinungdan sa nagkataas nga mga kaso sa cancer sa kalibutan mao ang aso nga gibuga sa mga sakyanan sa kadalanan. Kini nga pagtuon sa World Health Organization (WHO) gidasunan sa laing pagtuon sa London, England.
Busa matag gamit diay nimo sa imong sakyanan, nag-contribute ka sa pagdaghan sa cancer.
Gawas niini, daghan pa og mga benepisyong gidala ang biseklita. Mao nang di matukib ang among kalipay nga ang hinayhinay namong giduso nga adbokasiya giĀdungog ug giaksyunan na.
Ang among gipaabot mao na lang ang pagbutang og bike lane bisan sa usa lang ka karsada isip simbolo sa pagpatuman sa bike lane ordinance sa dakbayan nga gipalabang sa miaging tuig.
Kon magkaminos ang gidaghanon sa mga sakyanan sa karsada kon modaghan ang magbiseklita pinaagi sa pagbutang og mga imprastraktura, matibhangan ang suliran sa traffic. Mominos ang mga sakit sa kasingkasing ug uban pa.
Busa, ayaw i-underestimate ang impact sa yanong biseklita sa atong pagpuyo.
Pahasubo
Namatay diay ang akong higalang si Chief Inspector Glenn Devocion, hepe sa Asturias police kagahapon sa buntag. Kini si Glenn grabe ka workaholic kay bisan siya police official, kon libre ang iyang oras, motukar gihapon siya uban sa iyang banda.
Tingali sa iyang kahago, wa na makaaguwanta ang iyang lawas.
Pahasubo ngadto sa iyang pamilya, labina sa iyang asawa. Rest in peace, bay Glenn.