HUMAN nahitabo ang pag-atake sa mga rebeldeng New People's Army (NPA) sa tulo ka dapit sa Davao City Sabado sa kaadlawon ug pagpamomba sa wa pa mailhing grupo duol sa Quiapo Church, Quezon Boulevard, Manila niadtong Biyernes sa gabii, milutaw ang pagduda nga gisabotahe sa rebeldeng grupo ang panagtagbo sa mga lider sa nasud nga sakop sa Association of Southeast Asian Nation (Asean) dinhi sa Pilipinas.
Ang insidente sa siyudad sa Davao mikalas og duha ka kinabuhi sa NPA, niangol og duha ka empleyado sa Lapanday Foods Corporation ug usa ka fish vendor kinsa naigo sa pagbuto sa landmine didto sa Barangay Mandug, Buhangin District.
Samtang, ang insidente didto sa kaulohan miangol sa 11 ka mga inosenteng tawo nga nakapakurat sa katawhan nga naglaum nga wa makalusot nga dautang elemento tungod kay hugot ang seguridad sa kaulohan.
Tungod sa maong hitabo, mas gipahugtan sa otoridad ang seguridad dinhi sa siyudad, labi na gitakdang moabot si Indonesian President Joko Widodo sa adlaw'ng Dominggo.
Si Davao City Mayor Sara Duterte-Carpio nagsulti nga pagpangatake sa NPA usa ka terorismo nga buhat human gidis-armahan ang mga security guards sa Lapanday, dayon gipamusil ang mga guwardiya ug gisunog ang box plant ug plastic plant building sa Barangay Mandug.
Giingon nga sakop sa Pulang Bagani Command (PBC) 1 sa NPA ang miatake.
Alang sa mayor nga personal nga insulto kaniya ang gibuhat sa NPA gumikan kay ang lokal nga kagamhanan sa siyudad misuporta sa padayong hinabing pangkalinaw tali gobyerno ug National Democratic Front of the Philippines.
"The attacks perpetrated by the New People's Army today in Davao City are acts of terrorism. I take what happened today as a personal insult especially because the local government of Davao City has been supportive of the peace negotiations," pahayag sa mayor.
Daling mibisita ang mayor sa mga dapit nga nahitaboan ug nakig-istorya sa mga residente ingon man ang paghatag og pasiunang tabang sa mga biktima nga nadala sa ospital.
Ang tactical offensive operation sa NPA dungan nga gilusad sa mga pasilidad nga gipanag-iyahan sa Lapanday ug Lorenzo Farm sa Buhangin District, Bunawan District ug sa Barangay Pangyan sa Calinan District.
Sa Barangay Mandug, gidauban sa mokabat 80 ka mga rebelde ang box plant ug plastic plant building sa Lapanday ug dihang padulong na ang tropa sa kapulisan sa Buhangin, gilayong nagpabuto og landmine ang mga NPA nga gikaangol sa fish vendor nga si Larry Timbal Buenafe.
Gipangpusil sab ang mga security guard sa plastic plant sa Mandug ug sa Lorenzo Farm sa Calinan dihang misukol na unta sila kay ilang namatikdan ang mga rebelde kinsa nagpakaaron-ingnon ug nag-inspeksyon sa planta nga ang suot dunay tatak nga NBI.
Si Chief Inspector Carlito Apilat, hepe sa Calinan Police Station, nagbutyag nga human sa hitabo napalgan ang duha ka patay nga lawas sa gituohang mga rebelde ug dunay usa ka M16 Armalite rifle ug tulo ka mga shotgun.
"Sa mga pamilya nga nawad-an og miyembro labi na kadtong gituohang miapil sa kalihukan sa NPA ang ilang kabanay, naa sa Angel Funeral Parlor ang ilang patay nga lawas," ingon ni Apilat.
Kasundalohan nanawagan
"Panawagan natin sa community na magsumbong sa authorities kung sa palagay nila may mga tawo sa paligid nila na parang iba ang kilos at may masasamang plano," sulti ni 10th Infantry Division commander Major General Rafael Valencia.
Padayon sab ang manhunt operation sa kasundalohan sa mga NPA ug gipakusgan ang pagbantay sa mga utlanan sa Davao City sa mga NPA-infested areas.
"We still now conducting manhunt operation sa mga NPA at nagpapadala na rin tayo ng mga karagdagang tropa," ingon ni Eastern Mindanao Command (Eastmincom) spokesperson Major Ezra Balagtey.
Hinungdan sa pagdaug-daug
Si Carlo Olalo, secretary-general sa Kilusang Mayo Uno (KMU) sa Southern Mindnao, nagbutyag nga resulta kini sa giingong pagdaug-daug sa mga mamumuo.
"Nakita na gyud tingali sa NPA nga di tawhanon ang pagdaug-daug sa mga pobre ug yanong mamumuo nga hinimoan sa kining Lorenzo sa Lapanday and companies," ingon ni Olalo.
Gidugang ni Olalo nga i-apil nila kini sa singgit sa kadalanan sa Mayo 1 (Labor's Day) gumikan giingong dugay na kining hinimoan sa Lapanday ngadto sa ilang mamumuo.
Sa laing bahin, gipahibalo sa Lapanday nga mopahigayon sila og press conference labot sa hitabo kagahapon sa mosunod nga mga adlaw.