GITUGAW  sa alarma sa sunog  ang kasa­ulogan sa atong kaugalingnan gahapon sa buntag.  Samtang nangandam ang tanan sa selebrasyon, kalit ningiyaw ang mga trak sa  bombero aron tubagon ang alarma sa sunog sa Barangay Lorega San Miguel sa dakbayan sa Sugbo. Akong naabtan ang mga molopyo nga nagdinaganay pas-an ug bitbit ang ilang mga kabtangan. Dunay nagkugos ug nag guroy sa ilang mga anak. Niabot sa second alarm ang sunog. Sa unang pagpanglista napulo ka balay ang naapiki. 

Nabiyaan

Ang labing pait nga bahin sa alarma mao ang pagkasunog og apil sa upat pa lang ka bulan nga batang lalake.Ang  ginikanan sa bata nga sila si Ryan  ug Joan Pa­ragoso nitug-an nga tungod sa kakalit sa hitabo, wa na nila makuha gikan sa lawak ang natug nga si John Carlo. Matod ni Joan nga si John Carlo kauban og katug sa  amahan sa second floor.  Samtang ang laing duha nila ka bata sila si Echeko ug Bonjing kauban ni Joan  og katug sa silong.

Sa pagdinaganay na, usa ka 9 anyos nga si Jopay Alivio maoy nibira kang Bonjing 6 anyos,  padung sa gawas.  Uwahi na sa dihang nadiskitaan nga tua pa sa  taas si John Carlo.  Dako na kaayo ang kayo ug sa dihang napawong na, nibantang sa mga rescuer ang sunog nga lawas sa bata. Gipangandaman na ra ba unta sa ginikanan ang gitakda nga bunyag ni  John Carlo sunod bulan.

Sa akong pagtoo kon may klase pa gahapon, posibling sayong magtikaw tikaw ang pamilyang Paragoso. Ug posibli sab nga nakuha na si John Carlo sa taas sa wa pa ang alarma. Lisod ning pukawon ka og alarma. Siguradong matarantar ka.

Krimen

Niadtong Huwebes, ang kapulisan sa dakbayan sa Sugbo nanghatag og mga leaflets ngadto sa mga tinun-an. Ang unod sa leaflets mao ang mga numero sa landline ug cellphone sa kapulisan nga maoy kontakon sa panahon nga nanginahanglan sila ug tabang sa atong kapulisan. Sila si Ana Arnoco ug Irish Lobitaña mga tinun-an sa Cebu Normal University niduol kang Chief Insp. Enrique Belciña ug nangutana nganong di magamit nga libre ang cellphone pagkontak sa pulis. Ang buot nilang ipasabot mas maayo unta nga magamit nila ang ilang cellphone pagtawag bisan kon way load. Wa gyud to paabota ni Belciña nga motumaw ang maong pangutana gikan sa mga tinun-an. Ang iyang tubag makigsabot sila sa mga telecommunication company aron matubag ang maong pangutana. Sakto sila si Irish ug Ana.  Pagreport og krimen o pagpanawag og tabang naa ra gyud sa atong mga kamot ginamit ang cellphone. Unta way presyo kon kalinaw ug kahusay nay hisgutan.