Mga kompanya, agalon wa motuman sa minimum wage sa Davao del Sur
DAVAO DEL SUR -- Mialma ang ubang trabahante sa probinsya human nga wa motuman ang ilang mga agalon sa mandato sa minimum wage nga gipaguwa sa Regional Tripartite Wage and Productivity Board (RTWPB) sa Davao Region.
Nasayran nga ang ubang trabahante sa lalawigan nagdawat lamang og tag P250 matag adlaw ug wala pay benepisyo nga ang ilang amo maoy mikuha kanila og Social Security System (SSS) ug PhilHealth.
Apan mas daghan sab mga trabahante sa umahan ang ginabayran lang og tag P150 ang adlaw sa ilang pagpang-hornal sama sa 24-anyos nga mag-uumang si Victor nga taga Barangay Manga, Matanao, Davao del Sur.
Matud niya nga duha ka tuig na niyang gi-agwanta ang ginadawat nga kita gikan sa iyang amo nga politiko kay libre ra man ang iyang pagkaon sa paniudto.
Si Victor ang adunay tulo ka mga anak nga nagtungha ug mitataw nga kuwang ra kaayo ang iyang kita ilabi pa nga motungtong na sa High School ang iyang kamaguwangan karong bulan sa Hunyo.
Sa Bansalan, Davao del Sur, nag-antus sab si Elina, 32, sa ginadawat nga P200 nga sweldo sa usa ka kumpanya sa pancitan ug wa sab siya’y ginadawat nga laing benepisyo gawas sa pinaskuhan matag buwan sa Disyembre.
Sugod karong adlawa, Labor Day, ang RTWPB nagmando nga ipatuman ang bag-ong mininum wage nga P340 ug P5 nga Cost of Living Allowance alang sa mga trabahante sa non-agriculture/industrial/commercial ug retail service nga adunay kapin 10 ka mga kawani.
Sa mga trabahante sa agrikultura, angayan sab nga modawat sila og P325.00 nga sweldo matag adlaw ug susamang suhulan ang dawaton sa mga nanarbaho sa mga retail store nga wala moabot sa 10 ang trabahante.
Sa Sta. Cruz, Davao del Sur, gibutyag sa trabahante nga si Ariel, 23, nga siya pa mismo ang nagbayad sa iyang SSS contributions matag quarter human nga wa siya’y ingon niining benepisyo sa planta nga gitrabahoan.
Gibutyag sab sa security guard nga si Noel, 26, nga gamay ra kaayo ang ginadawat nga sweldo sa ilang ahensya kun itandi sa ubang ahensya sa mga sekyo.
Apan, sumala sa Department of Labor and Employment nga masulbad lamang ang suliran sa mga trabahante kun moadto sa ilang buhatan ug moreklamo batok sa ilang agalon nga mapahimuslanon.