SA pipila ka nangaging katuigan, grabe ang uwan nga nasinati sa nasod, apil na sa Sugbo. Kanunay nahitabo ang mga kalit nga pagbaha ug pagdahili sa yuta tungod sa way puas nga pag-uwan.
Samtang grabe ang uwan, gihuna-huna sa kagamhanan ug katawhan mao ang paglikay sa mga katalagman dala sa tubig.
Karon, di pa gani dugay nga nagsugod ang mild El Niño, ang katawhan nagsige na og pangita kon hain na ang uwan. Ang uwan nga gikahadlukan kaniadto, mao nay gipangita sa kadaghanan.
Ingon sa musika sa mga dunggan ang matag patak sa uwan. Apan ang nanglabay nga mga uwan wa makausab sa kahimtang sa mga tinubdan sa tubig sa Sugbo.
Hinunoa, padayong nagkaubos ang produksyon sa tubig sa Metro Cebu Water District (MCWD) nga maoy hinungdan sa pagtiyabaw sa ilang mga konsumidor. Grabeng nakatiyabaw mao ang mga lumolupyo sa southern Metro Cebu nga nagsalig sa Jaclupan ug Buhisan dam isip mga tinubdan sa supply sa tubig.
Nagsugod pa lang ang mild El Niño karon. Unsa na kahay mahitabo kon way uwan nga moabot sa Sugbo hangtod sa pagtapos sa tuig? Mao ra ba ni ang napanglantawan sa mga weather forecaster.
Klaro nga ang kagamhanan reaksyonaryo kanunay. Way igong panglantaw sa bisan unsa nga klase sa katalagman nga moabot.
Ang huwaw usa ka matang sa katalagman nga hinayhinay nga mopaantos ug mopatay, apan wa panagan-i.
Nagtiyabaw karon ang katawhan sa epekto sa kainit sa panahon. Ang gihisgutang sulusyon mao ra ang pagdaginot sa tubig.
Wa na gyuy lain? Nganong ang mga nasod sa mga desyerto sa tubig wa man maagrabyado? Hinuktokan unta kini sa kagamhanan.