DUMAGUETE CITY - Patay ang kanhi sakop sa Army Special Action Force (SAF) human gipusil sa makadaghang higayon sa usa ka pulis didto sa Barangay Poblacion, dakbayan sa Guihulngan.
Ang biktima giila nga si Reynaldo Olila, kanhi sakop sa SAF samtang ang pulis nga nakapusil gitumbok nga si PO3 Carl Marc Logronio Jopillo, 37, ug nadestino sa Guihulngan PNP.
Sumala sa imbestigasyon, nagtumbok nga si Jopillo mipahigayon og surveillance batok sa usa ka drug personality sa Sitio Pisok, Barangay Poblacion sa naasoyng dakbayan.
Atol sa pagpahigayon og surveillance ni Jopillo niabot usab ang biktima nga si Olila nga impluwensiyado sa ilimnong makahubog ug giingong nag-wild.
Gitambagan ni Jopillo nga mokalma apan inay nga mupatuo misuway hinuon kini pag-ilog sa service firearm sa pulis.
Sumala ni Jopillo nga misuway unta siya pagbalik sa ilang buhatan sa kapulisan apan misuway gihapon pag-ilog sa iyang armas si Olila ug iya kining napusilan.
Ang kanhi skop sa SAF nakaangkon kinig nagkadaiyang samad pinusilan sa iyang lawas hinungdan sa hinanaling kamatayon.