ORMOC CITY - Konsehal sa lungsod sa Albuera, Leyte gidakop sa kapulisan didto sa Davao City niadtong Huwebes sa buntag.
Si Konsehal Sergio Batistis Jr, gidakop tungod sa giingong pagpamaligya niinig peke nga resibo ug certificate of appearance sa iyang mga kaubang konsehal.
Kasamtangan nga gibalhog si Batistis sa Sta. Ana Police Station ug nag-atubang og kasong swindling through falsification of public documents.
Base sa pamahayag sa Philippine Councilors League (PCL), dugay nang na-report ang kalihokan ni Batistis sa milabay nga panagtigom sa mga konsehal sa nasod.
Alas 9:00 pasado sa buntag niadtong Huwebes, nihangyo si PCL Executive Director Wilson Paclibar ngadto kang General Santos City Councilor Dominador Lagare III nga magsilbing ‘poseur buyer’.
Ang transaksyon nahitabo sa SMX Convention Center sa Lanang, Davao City diin gipahigayon ang panagtigom sa mga konsehal lukop nasod.
Human sa transaksyon giposasan gilayon sa kapulisan si Batistis ug gidala sa kapulisan.
Nakuha gikan sa posisyon ni Batistis ang P103,500 nga salapi.
“Kami wa gyod nuon mi mabiktima ana kay magbayad naman mi daan sa una pa mi moadto, kasagaran biktima kanang adto na mobayad or kanang walk in ba,” matod ni Ormoc City Councilor Vince Rama.
Giaugilon ni PCL National Chairperson Alma Moreno nga sinyales kini sa ilang seryusong paglimpyo sa mga binuang sa ilang sakop ug pag protektar sa ilang imahe.
Si Batistis nidaog niadtong 2013 nga piniliay ubos sa Liberal Party ug nakaangkon og 6,893 nga buto.