PALO, Leyte - Kagawad sa usa ka barangay na­dakpan ug nakuhaan og balor P2.4 milyones nga shabu sa buy bust operation sa Palo Leyte.

Ang suspek giila nga si Abdulcader Panantaon, anaa sa hustong edad, usa ka kagawad sa Barangay Dalama, Mulondo, Lanao Del Sur.

Base sa report sa Philippine Drug Enforcement Agency (PDEA) 8 nga alas 4:00 sa hapon sa milabayng adlaw usa ka buy bust operation ang ilang gihimo uban sa Regional Anti Illegal Drugs Special Operations Task Force (RAIDSOTF), Provincial AIDSOTF, Tacloban City Police ug Criminal Investigation and Detection Group (CIDG) 8 didto sa Borderline Cottages, Maharlika Highway, Barangay Pawing, lungsod sa Palo Leyte.

Nilampos ang mga operatiba sa pagsikop sa suspek ug nakuha sa iyang posisyon ang upat ka dagkong pakete sa gituhoang shabu nga may timbang nga kapin kon kuwang 300 gramos.

Dugang sa report sa PDEA, ang nakuhang shabu dunay market value mokabat sa P2,400,000.

Matod sa PDEA nga taudtaod na nilang gipanid-an ang suspek sa ilegal nga binuhatan.

Dugang pa niya nga mao kini bigtime nga tigbagsakan og shabu sa nahisgutang lugar gikan sa Lanao Del Sur.