DUMAGUETE CITY - Pinangita sa balaod human mieskapo sa Negros Oriental Provincial Jail niadtong miaging Marso 15, 2015 giingong napusilan patay sa mga pulis didto sa dakbayan sa Negros Occidental.
Ang napusilan patay giila nga si Ricardo Ybasan nga giingong maoy leader sa carnapping group nga nag-operate sa Negros Oriental.
Si Ricardo nabilanggo kini human nag-atubang og kasong carnapping sa Regional Trial Court (RTC) branch 45 sa dakbayan sa Bais ug kasong robbery sa Regional Trial Court (RTC) branch 43 sa dakbayan sa Tanjay.
Si OIC Provincial Warden Regulo Getalan sa Negros Oriental nakadawat og taho gikan kang P/Cinsp. Eduardo Corpuz sa dakbayan sa Kabankalan nga niadtong Mayo 28, 2015 nga si Ybasan ug laing kuyog ang nakasugat kinig lalis uban ni Dexter Decinal sa Barangay Barangay Camingawan, Kabankalan tungod lang sa iro.
Tungod niini gipusil nila ni Ybasan si Decinal apan nakalikay apan ang naigo mao ang isa ka estambay nga nailang si Luisito Gigataras nga naigo sa dughan.
Subay sa hitabo daling mirespondi ang kapulisan sa Kabankalan ug ilang gikapinusilay silang Ybasan sa Sitio Labamba, Barangay Orong ug giingong naigo sa abaga si Ybasan ug nakabsan sa kinabuhi samtang nakaiskapo ang kauban niini.
Ang patayng lawas ang gikompirmar kini nga kang Ybasan pinaagi sa pamilya niini.
Nakuha gikan sa nahitaboan sa krimen mao ang usa ka kalibre .45 nga pistola, magazine, bala, cash nga P2,266 ug motorsiklo nga gituhoang gipanag-iya ni Ybasan.