GIANGKON sa Department of Environment and Natural Resources (DENR) 7 nga aduna sila’y mga nadawat nga request alang sa tree cutting permit apan ila kining gipang-uli kon ubos kini sa gidumala sa Department of Public Works and Highways (DPWH).

Lakip sa mga gipangdumala sa DPWH kining national higways.

Matod sa regional executive director sa DENR 7 nga si Dr. Isabelo Montejo nga adunay memorandum order nga gipagawas ang secretary sa DPWH nga si Rogelio Singson nga dili magputol og kahoy sa mga pagpalapad sa dan sa tibuok nasod.

Dugang si Montejo nga kon aduna’y DPWH road project dinhi sa Central Visayas nga mag-request og tree cutting permit i-uli gilayon kini nila kon walay clearance mismo kang Singson.

Nag-agad ra sila sa DPWH secretary nga tang-tangon ang maong memorandum aron makahatag sila og permits, “dapat may clearance from secretary,” si Montejo nagkanayon.