WAY igong pundo ang Provincial Health Office (PHO) alang sa pagdawat og psychologist nga maoy idestino sa Cebu Provincial Detention and Rehabilitation Center (CPDRC) aron motabang sa mga piniriso nga anaa sa tumang kagul-anan.

Si Dr. Cynthia Genosolango, pangulo sa PHO, niangkon nga wa silay plantilla alang sa pag-hire og bag-ong psychologist.

“Murag wa tay item for that,” pag-angkon niya dihang nahinabi sa mga tigbalita.

Apan, aduna silay duha ka rehistrado nga mga nars nga maoy ilang Health Education and Promotion Officers nga mahimo niya ipaubos sa makuti nga pagbansaybansay alang sa pag-atiman sa maayong panghunahuna sa mga bilanggo sa CPDRC.

Ang maong mga nars maoy gitahasan ni Genosolango pag-atiman sa mga programa sa pagsumpo sa human immunodeficiency virus (HIV), sa High Impact 5 ug ubang makatakod nga mga balatian.

Siya nidugang mahimo usab sila mohangyo sa kadagkuan sa Department of Behavioral Sciences sa Vicente Sotto Memorial Medical Center nga mopadala og mga espesiyalistang doktor o psychiatrist kon adunay oras ngadto sa CPDRC.

“We will provide the other logistical support like transportation,” nagkanayon si Genosolango.