USA ka 15 anyos nga lalakeng dunay polio ug gibiaybiay sa iyang mga classmate ug silingan naghikog kagahapon sa alas 11 sa buntag sa Barangay Mangyan, Sibonga, habagatang Sugbo.

Si Gory Padillo, tinun-an sa Grade 7 sa Ocaña National High School, sa dakbayan sa Carcar, dead-on-arrival (DOA) sa tambalanan sa Sibonga.

Si SPO1 Jaime Mendoza, sakop sa alert team sa Sibonga Police Station nga nahinabi sa Sun.Star Superbalita, nagkanayon nga ang bata naguol og maayo human gibiaybiay sa iyang mga classmate ug silingan.

Matod ni Mendoza nga kaliwat sa pamilya nga kon modagko na, mokalit lang og sulod ang polio.

“Bag-o lang daw ning iyang polio. Pun-an pa sa bugal-bugal sa mga classmate, sa mga silingan, naguol og maayo ang bata,” dugang ni Mendoza.

Sumala pa niya nga ang inahan nga si Julia maoy nakadiskubre sa paghikog sa iyang anak gikan siya sa lakaw samtang wa usab ang iyang bana.

Kagahapon sa buntag dihang nanguhag kahoy si Gory aron isugnod samtang nilakaw ang iyang mga ginikanan.

Nakugang si Julia dihang iyang nakit-an nga nagbitay ang iyang anak sulod sa ilang balay nga naghikot sa iyang “pan­yo” sa liog.

Naginhawa pa si Gory dihang gidali sa inahan sa pagtangtang ang hikot ug nangayog panabang sa iyang mga kabanay ug mga silingan sa pagdala sa tambalanan.

Apan gideklarar nga dead on arrival si Gory.

Matod ni Mendoza nga ang bata naghikog atu­bangan sa iyang ma­gu­wang babaye nga ma­sa­kiton sab og polio.