MOKABAT sa P1.6 milyones nga shabu ang nasakmit sa City- Anti Illegal Drug Special Operations Task Group (CAIDSOTG) sa dakbayan sa Lapu- Lapu sa tulo ka mga buy- bust operation sud lang sa duha ka adlaw niadtong Miyerkules ug Huwebes.

Gibanabana nga mo­kabat sa P1.534 milyones ang nasakmit nga sha­bu sa CAIDSOTG atol sa ilang operasyon niadtong Huwebes sa gabii sa Bou­genvilla Village, Brgy. Ma­ri­gondon, sa dakbayan.

Ang operasyon nga gipanguluhan ni P/Sr. Insp. Verniño B. Noserale, hepe sa CAIDSOTG inubanan sa mga sakop sa Philippine Drug Enforcement Agency (PDEA) 7, maoy hinungdan sa pagkasikop nila ni Meriam S. Ampaso, 39 anyos, ug si Jeffrey B. Casil, 28 anyos, taga Buyong, Brgy. Maribago sa dakbayan.

Matod ni Noserale sa dihang nahinabi sa Sun.Star Superbalita kagahapon nga si Ampaso kinsa gihulagway nga usa ka level two drug pusher  maoy target sa ilang operasyon mga alas 11 sa gabii.

Saysay ni Noserale nga si Casil gikatahong maoy tandem ni Ampaso sa matag transaksiyon.

Dugang ni Noserale nga dugay na nga anaa sa watchlist si Ampaso apan kanunay nga magbalhinbalhin.

Si Ampaso lumad nga taga Salvacion, Lanao Del Norte ug nibalhin sa Sitio Kalubihan, Brgy. Pajac sa dakbayan mga 10 hangtod 15 ka tuig na ang nakalabay, matod ni Noserale.

Mga duha ka semana ang nakalabay sa dihang nakadawat og si Noserale nga sa  Bougenvilla Village, Brgy. Marigondon na nanimuyo si Ampaso maong ila kining gipanid-an.

Nakuha nila ni Ampaso ug Casil mao ang usa ka dakong pakete (100 gramos), lima ka medium- sized packs (5 gramos) nga shabu, boodle money nga balor og P8, 000, P3,500 nga cash nga gituohang kinitaan ug mga drug paraphernalia.

Niadtong Miyerkules sa gabii, mga P120,000 nga balor sa shabu ang nasakmit sa kapulisan sa duha ka managlahing buy- bust sa Brgy. Babag ug isla sa Olango.