HEPE sa kapulisan sa dakbayan sa Carcar gipasa­kaag kasong administratiba sa buhatan sa Ombudsman Visayas ingon man sa National Police Commission sa bana sa giingong iyang kabit.

Si Zandro (di tinuod nga ngalan) mipasakag kaso batok kang Supt. Teodulfo Manatad III sa Office of Ombudsman ug Napolcom.

Iyang gireklamo si Manatad kay ang iyang asawa nga si Jenn, nga sakop sa non-uniformed personnel (NUP) sa Carcar Police Station, dunay relasyon tali sa opisyal.

Si Manatad gitawgan sa Sun.Star Superbalita sa makadaghang mga higayon sa iyang cellphone aron kuhaan sa iyang habig, apan wa makontak.

Si Chief Supt. Prudencio Tom Bañas, director sa Police Regional Office (PRO-7) mimando sa Regional Investigation and Detective Management Division (RIDMD) sa pagsusi sa mga alegasyon ni Zandro.

Si Zandro nagsugod sa pagduda sa iyang asawa human nga tagdugay na kining mopauli gikan sa trabaho.

Si Jenn nirason nga nadugay siya kay nag-overtime gumikan sa kadaghang gipatrabaho kaniya sa ilang buhatan.

Niadtong Abril iyang nasakpan si Manatad ug Jenn nga naghawok sulod sa sakyanan sa police official gawas sa ilang balay sa dakbayan sa Talisay.

Si Bañas nagkanayon nga nagpadayon ang imbestigasyon sa maong kaso, diin si Manatad madutlan sa administratiba kon dunay igong ebedinsiya.

Sila si Manatad ug Jenn gipatawag na sa PRO-7 niadtong miaging buwan, apan ang duha pulos nanghimakak nga duna silay relasyon.

Gitun-an ni Bañas nga ibalhin sa laing position si Manatad samtang nagpadayon ang imbestigasyon.