TUNGOD sa naghingapin nga selos ug pagduda nga ang iyang ka- live in may uyab, usa ka 27 anyos nga gwardya nipusil- patay sa iyang silingan sa Sacris Road Extension, Brgy. Banilad, dakbayan sa Mandaue pasado alas 12 sa udto kagahapon.
Dead-on-the-spot si Robertson Tayrus, 34, may live- in, kawani sa World Wide Steel Corp. sa nahisgutang dapit apan lumad nga taga Pilapil, Brgy. Casuntingan, sa maong dakbayan.
Si Tayrus namatay human milapos ang bala sa .38 caliber revolver sa iyang liog.
Matod ni PO1 Alfie D. Sabuero sa Investigative and Detective Management Branch (IDMB) sa Mandaue City Police Office (MCPO) nga si Tayrus silingan sa suspek nga si Mario Abello Jr., 27, may live- in partner ug duha ka anak, usa ka gwardiya sa EGJ Agency, taga Sitio Barlaps, atbang lang ang balay sa biktima.
Sa pakisusi ning mantalaan nasuta nga ang suspek dugay na nga nagduda ni Tayrus nga may relasyon sa iyang ka-live in.
Giingong kagahapon sa buntag, ang ka live- in usab ni Tayrus mismong niadto sa balay ni Abello ug mikomprontase sa ka live in sa suspek nga magpalayo sa iyang kapuyo.
Gipasidan- an usab sa ka live-in ni Tayrus ang suspek nga pabantayan ang iyang ka- live in tungod kay matod pa gi kabit kabit kini sa iyang kapuyo.
Si Abello nga dugay na usab nagduda kabahin sa relasyon tali sa iyang live-in partner ug ni Tayrus, giingong miatang sa biktima nga migawas sa iyang trabahuan aron maniudto mga alas 12:10.
Matod ni Sabuero nga tungod sa kalagot sa suspek, wa na niya paminawa pa ang katin- awan sa biktima kabahin sa kon unsay anaa kanila sa ka- live-in ni Abello.
Gamit ang kalibre .38 revolver, gipusil ni Abello si Tayrus sa iyang liog ug kini milapos hinungdan sa kamatayon niini.
Paambit ni Sabuero sa Sun.Star SuperBalita nga nakaangkon og duha ka samad- pinusilan si Tayrus sa liog.
Sa dugang pakisusi ning mantalaan, nasuta nga ang pusil nga gigamit sa suspek sa pagpamusil usa ka service firearm gikan sa iyang trabahuan.
Saysay ni Sabuero nga atol sa hitabo, si Abello mi-absent without official leave (AWOL) ug possible nga ang armas de fuego nga gigamit niini tinaguan.