DEAR Noy Tikyo,
Tawga lang ko sa ngalan nga Bingkay, 37 anyos, nagpuyo sa usa ka barangay dinhi sa siyudad.
Napulo na ko ka tuig nga minyo sa akong bana ug duna na mi mga anak.
Ang akong bana naila nga duolonon sa mga babaye kay lingaw siyang ubanan kay komedyante.
Apan bisan pa niini, wala ra nako tagda kay wala man siya magbinuang namong iyang pamilya. Kay gitagaan man mi niya og panahon ug kanunay ang suporta ngadto namo.
Gipasagdaan lang nako kay wala man siyay gibuhat nga dautan.
Ako lang gilingaw ang akong kaugalingon pinaagi sa akong pagtutok sa akong gimbuhaton sa panimalay ug pag-atiman sa among mga anak.
Apan kining tanan nausab sa dihang nagsugod na ko og panumbalay sa among mga silingan. Daghan na man kong madungog nga tsismis bahin sa akong bana nga daghan kuno siya og mga babaye.
Bisan sa iyang mga kauban sa trabaho, mosulti nga singaw lagi kaayo ang akong bana sa mga babaye. Grabe kuno kaduol sa mga babaye.
Dinhi na nagsugod ang akong pagpanelos sa akong bana. Gamay rang istorya, manginit dayon ang akong dunggan, busa magselos ko.
Kini maoy hinungdan sa among away kay magduda man ko nga nagbinuang siya.
Nganong nagproblema na man ko sa akong bana, Noy?
r
Bingkay
***
Bingkay,
Sa akong pagsabot, ikaw ra ang nagmugna og problema sa imong kaugalingon.
Kanang imong pagpaminaw sa mga tsismis sa imong silingan mao na ang naghatag og problema nimo. Kanang imong pagpaminaw sa sulti sa ubang tawo, mao ni ang nakamugna og kasamok sa inyong pagpuyo.
Sumala god kadtong tutok ka sa imong kaugalingong pagpuyo, naa ka bay problema? Wala man. Bisan og nahibawo ka nga siaw ang imong bana sa mga babaye apan imo lang kining gibalewala kay wa ka may nakita nga gibuhat nga dautan sa imong bana.
Ang akong pagsabot sa imong suwat nga siaw ang imong bana sa mga babaye, kanang komedyante, mopakatawa nila hinungdan nga duolonon siya og mga babaye.
Duna man goy mga babaye nga gusto og lalaki nga dunay sense of humor, di lang kanunay magkusmod. Kasagaran sa mga lalaki nga duna niini nga kinaiya, duolonon gyud sa mga tawo, di lang sa mga babaye kay malingaw man sila. Di magsubo ang ilang adlaw kon ingon niini nga tawo ang ilang makauban.
Mao nga imbis nga magselos ka, magpasalamat ka hinuon kay dunay mga tawo nga napalingaw ang imong bana. Basin ang uban nila dunay gihambin nga suliran apan gitipigan lang sa ilang kaugalingon. Pinaagi sa imong bana nalingaw sila ug nahupay ang ilang mga problema bisan og makadiyot lang.
Puriso undanga na kanang imong pagpanumbalay kay di kini makaayo nimo ug sa imong pamilya. Ibalik ang kanhi imong ginabuhat nga tua ka lang kanunay sa inyong panimalay mag-asikaso sa imong gimbuhaton.
Kon molaag ka man gani, ubana ang imong bana ug mga anak aron nga maka-bonding mo og maayo inay nga molaag ngadto sa imong mga silingan nga tsismosa nga usahay maoy makaguba sa pagpuyo sa ubang tawo.
Undanga na kanang imong pagpanelos kay way maayong paingnan kini kon di kagubot ug away sa panimalay.
Noy Tikyo