DAVAO DEL SUR -- Gipasiatab sa Department of Education (DepEd) sa probinsiya nga wa sila magkuwang sa pagpasabot sa ilang mga tinun-an kon unsa ang tinuod nga kahulogan sa kagawasan sa nasud.

Suma ni Ginang Marilyn Deduyo, DepEd assistant school's division superintendent, gisaulog sab nila ang National Flag Day niadtong Mayo 28.

"Actually, atong gitudlo sa atong kabataan kon unsa ka importante ang pagrespeto sa atong Philippine flag ug ang national anthem," tin-aw ni Deduya.

Matud niya, wa giwagtang ang flag raising ceremony matag adlaw'ng Lunes ingon man ang paghipos sa bandila sa Biyernes sa hapon.

"Part man na sa atong curriculum ang pagtudlo kanila sa pagtahod sa bandila gani bisan dinhi sa division office naa pod ta flag raising every Monday," niya pa.

Gitataw sab niini nga di susama kaniadto nga daan na kaayo ang mga flag sa matag tunghaan, karon pulos bag-o na kini.

Apan sa pagpangutana sa Superbalita sa 10 bata sa elementarya daghan ang wa makasabot unsa ang Independence Day.

"Holiday, way klase kay pista man sa mga flag," tubag ni Rachel nga tinun-an sa Grade 6 sa Don Mariano Elementary School sa dakbayan.

Si Juliet, 32, taga Aplaya ning dakbayan nagbutyag nga Hulyo 11 ang Independence Day.

"Araw man na sa atong mga bayani," niya pa. (Orlando B. Dinoy)