ADUNAY hangyo karon panahona ang Bureau of Fire Protection (BFP)-Northern Mindanao nga unta ang katawhan moseryoso sa pag-report kalabot sa sunog sa ilang buhatan.
Gibutyag ni BFP-Northern Mindanao spokesperson Noli Dela Rita nga 90 porsiyento nga ilang gakadawat sa telepono pulos prank calls.
Dili sila basta-basta moresponde tungod kay ilang iberipika unsa ka tinuod ang inpormasyon labina nga sagad sa gapanawag gapaila lang nga Miss X or Mr X.
Pag-adto sa bombero negatibo ang report.
Tungod niini daw kon adunay manawag kinahanglan nga kuhaon pa ang pangalan, unsa nga lugar ug dalan aron masuta nga tinoud ang gireport.
Nihangyo si Dela Rita nga unta mahimong responsable ang katawhan sa pagpahibalo kanila ug dili ipaagi og binuang ang pag-report tungod kay ang sunog usa ka seryoso nga insidente ug dili ipaagi sa prank calls.
Hinoun pabilin nga nanawagan si Dela Rita nga tungod sa sobrang kainit sa panahon magbinantayon ang tanan aron malikayan ang sunog.
Sagad sa natala mao kining grass fire gumikan sa kauga sa palibot ug kon maitsahan lang og agipo ug upos sa sigarilyo moresulta dayon sa sunog. (SVB)