ANG lokal nga gobyerno sa dakbayan sa Davao, mga pribadong hut-ong ug indibiduwal, mga estudyante lakip ang Davao City Police Office (DCPO) dungan nga mihandom sa ika-117th Philippine Independence Day kagahapon didto sa Rizal Park.
Dungan nga nakigduyog sa paghandom mao ang mga dagkong personahe sa Armed Forces of the Philippines (AFP) ug Philippine National Police (PNP) kinsa maoy nanguna sa pagtaas sa bandila sa nasud atol sa flag raising ceremony alas 7:00 sa buntag atubangan sa istatuwa ni Dr. Jose P. Rizal.
Naa sab ang mga representante gikan sa konsulada sa nasud Japan, Indonesia ug Malaysia, naa sab ang Veterans foundation nga dungan nga mihalad og mga buwak sa istatuwa ni Rizal samtang mihatag og pagsaludo ang mga opisyal sa Philippine Navy, Coast Guard, Airforce, Knights of Columbus, ug ang Mason Davao Chapter Knights of Rizal diha sa ilang pagrespito pinaagi sa pag-salute.
Si Davao City Administrator Atty. Melchor Quitain mitambong sab sa seremonya kinsa maoy usa sa mga dakong opisyal sa dakbayan hulip sa presensya ni Davao City Mayor Rodrigo Duterte.
Namulong sab si DCPO director Sr. Supt. Vicente D. Danao, Jr. nga alang niya, mahimong inspirasyon ang mga bayani sa paghatag og tinuod nga serbisyo sa nasud.
"Sa okasyong ito, tayo ay nagbibigay pugay sa kabayanihan, tapang, at malasakit na ipinamalas ng ating mga ninuno. Naway maging inspirasyon sila upang tularan na mamuhay at magsilbi ng tapat sa bayan," tipik sa pamulong ni Danao.
Subay sa tema karong tuiga, "Kalayaan 2015: Tagumpay sa Pagbabagong Nasimulan, Abot Kamay
na ng Bayan," giingon ni Danao nga andam ang kapulisan sa dakbayan sa pagserbisyo aron makab-ot ang tinuod nga kalinaw.
Matag tuig ang dakbayan sa Davao mohalad og usa ka pinasaheng pagsaludo sa mga bayani nga mibuhis og kinabuhi aron makab-ot ang kagawasan sa nasud gikan sa pagsakop
sa mga banyaga. (Jeepy P. Compio)