GIDUSO na sa City Prosecution Office ang kasong falsification of public documents batok sa konsehal nga nasikop sa entrapment operation sa kapulisan atol sa sa gipahigayong Philippine Councilors League (PCL) meeting niadtong Huwebes sa SMX Convention Center sa Lanang, Davao City.

Gidemanda mao si Councilor Sergio Antigua Batistis, Jr., sa Albuera, Leyte nga dunay P103,500.00 sa iyang mga kamot nga giingon nga kita sa iyang pagnamaligya og peke nga mga Official Receipts ug Certificates of Appearance sa Philippine Councilors League (PCL) 2nd Quarterly National Executive Officers - National Board Meeting alas 9:00 sa buntag.

Alas 10:00 sa buntag niadtong Huwebes, ang suspetsado gidala sa korte alang sa summary inquest procedure sa City Prosecution Office ubos ni Prosecutor Oliver Saniel.

Kahinumdoman, subay sa video nga gipakita sa mga imbestigador sa Sta. Ana Police Station, nakita nga nakigsabot ang suspek sa duha ka mga tawo nga pulis ug konsehal.

Dihang gitunol na ang marked money, mibarog ang suspek dayon gikwenta ang salapi nga gibayad kaniya mao nga gidakop dayon siya sa mga pulis.

Si Batistis, dihang gihinabi sa Sun.Star Davao Superbalita, miangkon nga nahimo niya ang krimen, apan nagdumili na siya paghatag sa detalye sa maong modus operandi.

Si Batistis gikataho nga unang miabot dinhi sa siyudad sa Davao aron makapa-imprinta og PCL certificate, rubber stamp ug uban pang peke nga dokumento nga gamiton niya sa iyang pagpangilad. (Jeepy P. Compio)