ANG 6-anyos nga Kagayanon nga si Ruelle Canino mao nalang ang nahibilin nga adunay dako nga tsansa nga makauli og dungog sa dakbayan sa nagpadayon nga 2015 ASEAN Age Group Chess Championships Standard event nga gipahigayon didto sa Singapore.

Sa upat nga round nga nabilin, nabugkos si Canino sa ikaupat nga pwesto ubanan nila ni Thai Ngoc Tuong Minh sa Vietnam ug Enkhbolor Nyamdavaa sa Mongolia nga adunay 3.5 puntos matag usa sa 8-under girls.

Sa niagi nga round, iyang napildi ang top seed nga si Sagar Siya gikan sa India sa ikaupat nga round.

Apan natilawan ni Canino iyang unang kapildehan kang Nguyen Le Cam Hien sa Vietnam sa ikalima nga round.

Makontra ni Canino ang usa na sab ka Vietnamese nga si Thai Ngoc Tuong Minh sa ikaunom nga round sa ning 9-round Swiss System nga torneyo.

Nangulo si Nguyen Hoang Thai Ngo sa ilang kategoriya nga adunay 4.5 puntos samtang sila Nguyen Le Cam Hien ug Nguyen Linh Dan nagbugkos sa ikaduha nga pwesto nga adunay upat ka puntos matag usa.

Taphaw na ang tsansa sa iyang igsuon nga si Ronald nga aduna lang 2.5 puntos sa human sa ikalima nga round sa 12-under open.

Si Me Ann Joy Baclayon gikan sa Misamis Oriental naa sa ikasiyam nga pwesto nga pwede pa moangat nga makalangkat og dungog human iposti og tulo ka puntos sa 12-under girls.

Ang kauban niya nga si Mary Joy Tan malabo na sa kontensyon nga niiskor lang og duha ka puntos. Kung ugaling mapakyas sila sa standard event anaa pay duha pa ka event sa rapid ug blitz.