NANGAYO og bayad ang mga lumad sa mga kadaot sa ilang mga kabtangan o mga tinanom sa Sitio Camansi, Barangay Banglay, lungsod sa Lagonglong, Misamis Oriental.

Gibutyag sa tigpamaba nga mao si Charita Acosta nga modemanda sila og bayad kung ilang mapamatud-an nga adunay kadaot sa ilang mga butang, mga tinanom ug mga kahayupan.

Karong adlawa giplano sa lumad nga mobalik sa ilang lugar human sa walo ka adlaw nga pagbakwit diha atubangan sa Capitol Ground niadtong niaging semana.

Mokabat sa 250 ka indibidwal ang namakwit sa reklamong gihasi sa mga sundalo.

Gipasalig sa mga sundalo sa 4th Infantry Division-Philippine Army (4ID-PA) nga mobiya usa sa lugar ug tubag ni Acosta nga kung ilang mapamatud-an nga wala na ang mga sundalo sa area mobalik na sila sa ilang lugar.

Samtang gikasakit usab niini nga gikalot ang bukog sa ilang sakop sa lumad nga namatay sa engkwentro sa mga sundalo tuig 2006.

Gibutyag niini nga dako og tulubagon ang mga sundalo sa ilang gihimo tungod kay ila na kining giampoan ug sa ilang tradisyon dili na kini mahimong hilabtan.

Samtang giklaro usab niini nga wala silay nadawat nga bugas o mga binhi susama sa giingong gipasiatab ni Governor Yevgeny Emano nga gitunolan na sila niini apan nakadawat lang sila og hygiene kit.