HABWA ang tinai sa usa ka lalaki human gidunggab sa nakaaway sa iyang asawa niadtong Huwebes mga alas 8:05 sa gabii sa Lunokan, Manolo Fortich, Bukidnon.

Kritikal ang kahimtang ni Roel Monteberde, 31, minyo ug lumolupyo sa susama nga dapit, human kini nilanding sa Northern Mindanao Medical Center (NMMC) ning siyudad sa Cagayan de Oro.

Subay sa report sa NMMC, diin gidala ang biktima, nga nagdagan nga mipauli ang asawa sa biktima nga si Marian tungod kay giingong dunggabon kini sa kaugalingong igsoon.

Giingong gigukod diay kini sa maong suspetsado ug naatol nga maoy pagkanaog sa biktima ug kalit kining gidunggab sa nahisgutang suspetsado.

Nakaangkon og samad dinunggaban sa kilid ang biktima ginamit ang kutsilyo diin nigawas pa ang tina-e niini hinungdan nga anaa kini sa talandugon nga kahimtang.

Sa pagsulat niini nga balita, ang maong suspetsado nagpabilin pa nga gawasnon samtang ang biktima nagpaalim sa balay tambalanan. (KCS)