BUAK ang ulo sa usa ka batan-on human nabangga ang gimaneho nga motorsiklo sa punoan sa kahoy niadtong Huwebes sa hapon sa Zone 2, Pagatpat ning siyudad sa Cagayan de Oro.
Ang biktima naila nga si Marvin Ganuhon, 19, ulitawo ug residente sa Zone 1, Pagatpat ning siyudad.
Matud ni Nelson, ang uyoan sa biktima, nga magkuha unta si Marvin sa iyang igsuon sa eskwelahan sakay sa motorsiklo apan sa pag-abot na sa maong dapit nabangga kini.
Giingong subay sa mga nakakita nga kusog ang padagan sa biktima ug kalit nga nibuto matud pa ang unahan nga ligid sa motorsiklo nga gimaneho hinungdan sa pagkabangga.
Gibutyag usab ni Nelson nga sukad pa kaniadto kusog na gayod nga magpadagan ang biktima ug gani sige kini niya nga badlungon.
Tungod sa kakusog sa pagpadagan grabe ang impak ug maayong pagkabundak sa ulo sa biktima kinsa wala usab nakasul-ob og helmet.