NAKABAKUNA na ang City Veterinarian's Office (CVO) og kinatibuk-ang 40,379 ka mga iro gikan Enero hangtud Marso ning tuiga.
Gibutyag ni Gay Pallar, CVO focal for Rabies and Control program and chief of Animal Disease Prevention and Control Section ngadto sa SunStar Davao Miyerkules, Mayo 10, nga ang maong ihap mas ubos itandi sa 52,560 nga nabakunahan sa milabay nga tuig.
Ang kalahian sa ihap, tin-aw niya, tungod kay mihatag sila og "full blown anti-rabies" campaign sa milabay nga tuig.
Gikanayon ni Pallar nga ning 2017, ang dakbayan dunay kinatibuk-an nga aktuwal nga populasyon sa iro nga 110,803 base sa ilang rekord.
Ning bulan sa Mayo, tulo ka mga kaso sa rabies namatikdan sa mga lugar sa Mintal, Marilog, ug Bunawan.
Iyang gitin-aw nga ila kining nakompirma pinaagi sa laboratory tests sa namatay nga mga iro nga gisumite ngadto sa ilang buhatan.
"We found that these dogs are those which are unvaccinated," tin-aw niya.
Giklaro sab ni Pallar nga ang dako nilang hagit karon mao ang pagseguro nga ang dakbayan luwas sa rabies tungod kay ang mga tag-iya sa mga iro kuwang og kaandam nga bakunahan ang ilang mga binuhi.
Mga napaakan og iro gilayong gitambalan sa City Health Office pinaagi sa ilang Animal Bite Center.
Sumala ni Pallar nga nakatala sila og 16 ka kaso sa rabies sa tibuok 2016, ug naglaum nga ang kasamtangang ihap nga mga kaso di modaghan nga masubay sa ilang tumong alang sa dakbayan nga mahimong gawasnon sa rabies sa 2020.
Dugang pa niya nga ang publiko puwede gihapon nga makapahimulos sa bakuna bisan unsang orasa sa ilang buhatan, ug kon mobisita sila sa matag distrito.
Giseguro niya nga duna silay igong bakuna nga gitipig sa ilang buhatan. (Karina V. Ca¤edo)
r