GITAWAG ang Cebu City og Queen City of the South. Harang dakbayan sa habagatan sa nasod. Basin kaniadto. Apan karon maorag kaduha-duhaan na kay daghang mga dapit nga maanindot na dinhi sa habagatan.
Sa Iloilo City lang, akong nakit-an ang hulagway sa ilang lapad nga karsada nga naa sa tunga ang bike lanes ug pathway. Bag-ohay lang sab silang milampos sa pag-rehabilitate sa ilang sapa nga hugaw kaniadto, apan limpyo na karon human gipabalhin pagpuyo ang mga lumolupyo nga dugay nang nagpuyo sa daplin.
Bisan sa pagpatuman sa bike lanes, kansang ordinansa giaprobahan, hinay kaayo ang dakbayan sa Sugbo. Kon mahianha ka sa tugkaran sa City Hall nga magbiseklita, badlungon ka sa mga guard, apan maglibog ka kay ang 4-wheel nga mga sakyanan pasagdan ra.
Tan-awa ra ang mga karsada sa dakbayan, gagmay. Kana lang sa South Road Properties, dagko pa na karon nga tan-awon tungod kay wa pa may nag-operate nga mga establisemento. Unyag kahuman sa SM diha, unya duna nay mga pasaheroang sakyanan nga manulod, gamay na lang kaayo na nga mga karsada.
Anha nimo makita ang kakuwang sa paglantaw sa umaabot sa mga urban planner sa kagamhanan. Kon gagmay ang karsada, mas dako ang espasyo nga mabaligya. Kon mas dako ang karsada, dako ang mapahak sa ikabaligya nga luna. Ang negusyo maoy gipalabi.
Kambyada
Sa biseklita, daghan ko og nakat-unan. Maora og kinabuhi ang pagsikad sa biseklita. Way nagbiseklita nga nidiretso sa pagsikad nga kusog ug maayo nang daan. Sama sa bata, magsugod ka sa sinugdan.
Dihang akong gipalit ang una nakong mountain bike niadtong December 2009, nisikad ko nga miuli dala ang biseklita. Usa ka oras kapin ang akong tinindakay. Di pa ko kahibawo mangambyada niadtong higayuna.
Bitaw, sa biseklita importante kaayo ang pagkat-on sa pagpangambyada. Pangutan-a ang mga siklista, sultihan ka nga ang una nimong tun-an sa pagtungas-tungas sa kabukiran mao ang pagpangambyada. Kon wa ka pa makat-on, ayaw una pangambisyon.
Importante
Nganong mahinungdanon ang pagkat-on sa pagpangambyada? Tungod kay sa pagtungas, magbalhinbalhin ka og gears, sa atubangan ug luyo. Gikinahanglan ang pagbalhinbalhin sa dako ug gamay nga plaka ug sprocket. Tan-awa kon makat-on ka na sa pagpangambyada, di ka na kuyawan sa pagtungas, labina kon imo nang ma-memorize ang tanan nga di na kinahanglan pang motan-aw.
Busa, ayaw tan-awa ang biseklita nga sayon ra. Di tiaw ang imong kat-unan. Bisan gani sa pagdulhog ug pagtungas, dunay mga posisyon nga haom alang sa mas luwas nga pagtindak.
Kon bag-o ka rang nagkat-on, pagtuon pa more.