Sugilanon: Motabang ang Diyos

Alcea Maningo

Cangyan, Carmen, Cebu

“DI ko kapalit sa imong baligya, Day. Lain man mig tinu­hoan!” matod sa hamtong nga babaye nga nahuman nag kaon diha sa kan-anan og litson sa Park Mall.

Naglingkod gihapon sa lamesa atbang sa lalake nga wa pa mahuman og kaon. Estrikta ang tunada sa sinultian sa babaye. Gidispatsar lang dayon si Leny nga dunay gi­tanyag nga mga baligya.

Ning sayong kaudtuhon mibarog lang una siya duol sa lamesa ug nanan-aw sa ubang tawo nga sunod niyang duolon. Hinuon, pabaga lang gyud sa nawong ang gibuhat ni Leny. Usa ka se­mana pa kini niyang gisugdan, ki­ning iyang raket. Nakasugat na siya sa tanang matang sa ta­wo. May mga garbuso, pasensiyahan niya. Apan duna say mga manggiluy-on, pasalamatan niya.

Gradwado siyag Nursing. Nakakuha nag board exams. Naghulat na lang sa resulta. Nag­sige sab siyag pangaplay sa lainlaing mga ospital, apan wa pa gyud siya nadawat. Sa pagpakitabang niya sa Diyos nga hatagan siyag kalampusan, namalit siyag daghang mga prayer booklet, mga nobenaryo sa Inahan sa Kanunayng Panabang, Santo Niño ug sa Holy Spirit kun Espiritu Santo, lakip na ang mga rosaryuhan. Nag-ampo siya sa Diyos nga unta makatrabaho na siya, kay hapit na usa ka tuig siyang nangaplay.

Gusto na niyang makatabang sa iyang ginikanan nga nakapangutang og dako tungod sa iyang panginahanglan sa pag-eskuyla, rebyu ug board exams. Drayber lang og traysikol iyang papa. Lab-ase­rag isda iyang mama. Unya may upat pa siya ka mga manghod nga anaa sa hayskol ug kolehiyo.

Gisulod niyag plastik ang mga nobenaryo ug rosaryuhan. “Ma’m, duna koy baligya, fund raising sa ministry of healing sa among simbahan,” mao niy gisulti ni Leny sa pagduol niya sa babaye ganiha. Unya gibalibaran dayon siya pagkakita sa babaye sa iyang mga baligya.

“Hatagi lag donasyon,” sugyot sa lalake nga pihong bana sa babaye.

“Wa lagi koy sensiyo,” sa babaye.

Mihunong pagkaon ang lalake. Mikuot sa iyang pitaka sa luyong bulsa sa iyang karsones. Mitunol og bayinte pesos nga papel de banko kang Leny.

“Salamat kaayo ninyo, Sir, Ma’m!” nga kahilakon sa kalipay nga midawat sa kuwarta. Mitalikod dayon siya aron modulo sa laing lamesa.

“God helps those who help themselves. Ang Diyos motabang sa tawong motabang sa iyang kaugalingon!” namulong ang lalake ug nabati pa ni Leny ang mga pulong sa iyang luyo. Hilom siyang nag-ampo nga unta modaghan ang maong matang sa tawo. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph