GIKLARO ni Bise Gobernador Agnes Magpale nga epektibo ang programang Suroy-Suroy Sugbo sa pag-promote sa nagkadaiyang destinasyon sa lalawigan sa Sugbo ngadto sa mga turista.
Reaksyon kini sa bise gobernador, chairperson sa committee on tourism and international affairs sa Sangguniang Panlalawigan sa Sugbo, human pipila ka mga mayor sa probinsya ang wa makauyon sa Suroy-Suroy Sugbo.
Matod niya pinaagi sa programa di na sila kinahanglan magpa-advertise sa telebisyon nga dako og bayad sa pag-promote sa mga suroyanan sa probinsya.
Suma pa niini gipaningkamotan nila nga di maalkansi og dako ang mga local government unit nga moapil sa Suroy-Suroy Sugbo tungod sa kadako sa gastohanan.
Si Magpale nitataw nga lahi ang budget alang sa promotion sa Suroy-Suroy ug lahi usab ang pundo alang sa pagpalambo ug pagpanindot sa mga suroyanan nga ihatag sa provincial government ngadto sa mga LGU.
Si Magpale nidugang kinahanglan ang mga mayor moduso sa ilang mga proposal kon unsa nga mga infrastructures developments ang ilang gusto himuon.