Reklamo batok ni Baricuatro
MIKLARO ang Visayas Ombudsman nga ang Bureau of Local Government Finance (BLGF-7) maoy gimandoan sa pag-suspenso sa tresurera sa lungsod sa Pinamungajan ug dili si Mayor Glenn Baricuatro.
Gumikan niini, si Baricuatro malaumong wala nay kapuslanan pa ang reklamong gipasaka batok kaniya sa Sangguniang Panlalawigan (SP).
Kini subay sa iyang kapakyas pagpatuman sa suspensiyon sa Municipal Treasurer sa Pinamungajan nga si Ursula Managaytay sulod sa usa ka buwan nga gimando sa Ombudsman nga ipatuman unta niadto pang Oktubre sa miaging tuig.
Gihulagway ni Baricuatro nga premature ang reklamong grave abuse of authority ug gross negligence nga gipasaka batok niya sa Hunta Probinsiyal sa usa ka Tirso Respondo.
Gipasabot ni Baricuatro nga andam siyang mosuspenso sa tresurera apan iya unang gipaabot ang musyon nga gisang-at ni Ursula nga mobayad na lang siya inay nga masuspenso siya sulod sa usa ka buwan.
Karong bag-o, ang Ombudsman nipagawas na sa ilang desisyon ug nagpahibawo nga gibasura ang musyon nga gipasaka ni Ursula ug gimandoan ang BLGF sa pagpatuman sa kamandoan.
Gihangop sa mayor ang desisyon ug miklaro nga wala sa iyang gahum ang pagsuspenso ni Ursula kon dili anaa sa BLGF diin nasakop ang iyang municipal treasurer.
Si Baricuatro nipadala og supplemental answer sa hunta probinsyal nga gipetsahan niadtong Hunyo 4.