TAN-IS ang gibati sa Oki Doki Dok human miabante sila sa semifinals sa 2017 Green Cagayan de Oro Eagles Inter-colors Basketball Tournament niadtong Huwebes sa gabie, Mayo 11, didto sa Southern Philippines College covered court.
Gikan nakaduhaan og pilde sa elimination round, nabaslan sa Oki Doki Dok ang Con-Air Alam Na agi sa 83-78 nga daug atol sa ilang do-or-die wild card rubber match.
Nangulo si Gitagum mayor Emmanuel Mugot og 23 puntos apil ang lima niya ka tres sa kadaogan sa Oki Dok.
Nakakuha og dakong inspirasyon ang Oki Dok pagtunga sa ilang bangiitang saligando nga si Waway Arocha, kinsa nihatag og 16 puntos.
Mas niluag ang opensiba sa Oki Dok sa presensya ni Arocha hinungdan abri sila kanunay pagpamomba og tres.
Nadiktar sa Oki Dok ang labaw ug nabinat pa nila ang ilang kinataas nga labaw nga siyam ka puntos sa kataposang kwarter.
Apan, nabura sa Con-Air ang pagdistansya sa Oki Dok human matabla ang dula sa 77-tanan sa 1:05 minuto nabilin.
Nibida si Mugot pagangkon og balik sa labaw agi sa iyang running jump shot sa 39 segundos nabilin sa dula, 79-77.
Nisulay ang Con-Air pagtabla sa dula apan nasimyat sa 21 segundos nabilin hinungdan napugos ang si Anton Pabillore pagkuha og foul kang Marvin Neri.
Gikan ana, nasilyo ni Neri ang kadaogan human gipasulod niya ang duha niya ka freethrows.
Sa unang rubber match nga dula, abante sab ang Baba Pro Audio sa semifinals human giparot nila ang B1 Team Lingas, 88-78.
Nihatag og dako si Tarotoy Remoto og 23 puntos, samtang niabag sila Hash ug Venzon Casino Jr. og 12 puntos matag usa.
Sa semifinals, maagbat sa Baba ang no.1 Romuls Power, samtang masangka sa Oki Doki ang no. 2 Rex Physical.