KAPIN sa P58.215 milyones nga kantidad sa mga utanon, lagutmon ug ubang tanom ang nangadaut gumikan sa kanihit sa uwan tungod sa El Niño sa kalungsuran ug mga siyudad sa lalawigan sa Sugbo.
Kini base sa mga report nga giduso sa 21 ka mga local government unit sa probinsya ngadto sa Provincial Agriculture’s Office sa Kapitolyo.
Kini naglakip sa Alegria, Borbon, Barili, Argao, Bogo City, Santander, Sogod, Asturias, Toledo City, Consolacion, Badian, Madridejos, San Fernando, Balamban, Catmon, Ronda, Alcoy, Danao City, Tabogon, Carcar City ug Santa Fe.
Sa dry spell damage report sa PAO, niabot og P20.655 milyones ang danyos sa kamaisan; P2,028,574 sa kahumayan; P4,821,505.54 sa utanon; PP12,805,000 sa sagingan; P 1,437,000 sa lagutmon; P16,000,000 sa tubo; ug P341,000 sa lubi.
Ang P58,215,624.54 motaas pa tungod kay ang ubang LGU wa pa makaduso og report sa kadaot nga namugna sa kainit sa panahon.
Dugang sa report, 1,618 ka mga mag-uuma ang kinatibuk-ang naapektuhan sa kanihit sa uwan diin 6,977.86 ka ektarya sa mga tanaman ug basakan ang apektado.
Ang dakbayan sa Bogo sa amihanang Sugbo ang nakaangkon og dakong kadaut nga nikabat og P20,542,350 ang danyos nga gisundan sa P10,410,000 sa Tabogon ug P8,768,186 sa Badian.
Si Roldan Saragena, pangulo sa PAO, niingon nga adunay mga mag-uuma ang nananom niadtong Mayo 3 nga maoy naandan na nila buhaton, ug nakapamugas apan gamay lang ug ang 72 porsiyento niini ang nadaut tungod sa kanihit sa uwan.
Tungod niini, nitambag siya sa mga mag-uuma nga magpaabot sa saktong uwan nga gibanabana sa Philippine Atmospheric, Geophysical and Astronomical Services Administration masinati sa tungatungang bahin sa Hunyo, sa di pa mananom.
“Mao nay advice nato nga di magpataka og tanom kay maigo ra gihapon og init kay anugon ang mga binhi (gipanghatag) nato,” nagkanayon si Saragena.
Kini sama pananglit sa kaumahan sa Alcantara nga wa mananom ang mga mag-uuma ug nagpaabot sa saktong uwan.
Matod niya nga ang pat-ak pat-ak nga uwan di makatabang sa mga pananom, nga makaturok man tuod apan mamatay ra gumikan sa kainit sa panahon.