GIKANAYON sa 15 anyos, pinakabag-ong partisipanteng batang atleta, kinsa naka-bronze sa 28th Southeast Asian (SEA) Games nga dili sayon para niya ang kalampusan.

Si Maiquel Jawn "Mikee" Teh Selga, wa milaum nga makakuha og bronze medal alang sa Tim Pilipinas nga mi-rehistro og 30.22 puntos sa boat-pulled women's open wakeboard finals didto sa Bedok Reservoir sa Singapore niadtong Biyernes.

Ang Dabawenyang rider, maoy pinakabata sa unom ka finalists, nga mas ekperensiyado uban nila Sasha Siew Hoon Christian sa Singapore ug Galuh Mutiara Maulidina sa Indonesia kinsa ikaduha ug ikatulo sa maong han-ay.

Ang 22 anyos nga si Christian miiskor og 59 puntos samtang ang 16 anyos nga si Maulidina mitala og 43.11.

"I feel great! I'm happy to be a bronze medalist in my first SEA Games," ni Selga, Grade 9 student sa Stella Maris Academy of Davao (Smad) atol sa Facebook interbyu sa Sun.Star Davao.

Dugang niya, "I only trained for two weeks but still managed to get a bronze."

Samtang si Selga, nag-post sa iyang Facebook, "Managed to get the bronze medal for the open women's wakeboard individual! Thank you for all your prayers and support on my debut to the #28thSeaGames! Happy Independence Day to all Filipinos!"

Puno og mensahe congratulations ug well-wishes ang mipaabot kang Selga human sa resulta.

Ang iyang teammate nga si Mark Howard Griffin naka-bronze sab sa men's open wakeboard nga dunay 69 puntos.